Para dzıýdodan álem chempıonatynda qaı salmaqta júldeler sarapqa salynady

ASTANA. KAZINFORM - Astana qalasynda 13-15 mamyr aralyǵynda alǵash ret ótetin álem chempıonatynda qansha salmaqta júldeler sarapqa salynatyny belgili boldy.

Dúbirli doda tórt jylda bir márte bolady. Ol para dzıýdo sporty úshin asa mańyzdy jarys retinde erekshelenedi. Bıyl oǵan 40 elden 350-den astam sportshy keledi dep josparlanyp otyr. Olardyń qatarynda 10 Paralımpıada chempıony jáne 12 Paralımpıada oıyndarynyń júldegeri bar.

Jahandyq dodada 10 salmaqta júlde jıyntyǵy sarapqa salynady. Erler 70, 81, 95, 95 keliden joǵary salmaqta beldesse, áıelder 52, 60, 70, 70 keliden joǵary salmaqta júldege talasady. Sondaı-aq, Halyqaralyq dzıýdo federatsııasy tájirıbe retinde Olımpıada salmaǵyna kirmeıtin 2 salmaqta (erlerde 64, áıelderde 46 keli) júlde sarapqa salynady.

Elimizdiń ulttyq quramasy jarysqa barlyq salmaq dárejesi boıynsha birinshi nómirli sportshylarmen qatysady. El namysyn Aqmaral Naýatbek, Erǵalı Shameı, Daıana Fedosova syndy tájirıbeli sportshylar qorǵaıdy.

Dúbirli dodada saǵat 10:00-13:00 aralyǵynda irikteý beldesýi bolsa, 15:30-17:00 shamasynla fınal belgilengen.

Halyqaralyq jarys J. Úshkempirov atyndaǵy Jekpe-jek saraıynda bolady.

Para dzıýdo 1988 jyly erler arasynda Paralımpıada oıyndary baǵdarlaamsyna engizilse, 2004 jyldan beri áıelder arasynda da júldeler sarapqa salynady.

Eske salsaq, budan buryn para dzıýdodan Qazaqstan quramasy Grand Prix týrnırinde top jardy.