Para berýge ıtermelegen advokattar ustaldy

NUR-SULTAN. QazAqparat - Mańǵystaý oblystyq advokattar alqasynyń advokaty ustaldy. Bul týraly QR Sybaılas jemqorlyqqa qarsy is-qımyl agenttigi 1-shi departamenttiń asa mańyzdy ister jónindegi tergeýshisi Qaısar Barjaqsynov aıtty, dep habarlaıdy QazAqparat tilshisi.

«Mańǵystaý oblystyq sybaılas jemqorlyqqa qarsy qyzmet jedel is-sharalar júrgizý barysynda alaıaqtyq jasaǵany jáne para berýge ıtermelegeni úshin 2 mıllıon teńge kóleminde aqsha berý kezinde Mańǵystaý oblystyq advokattar alqasynyń advokatyn ustady. Tergeý múddesine jáne QR QPK-niń 201-babyna sáıkes ózge aqparat jarııalaýǵa jatpaıdy», - dedi ol.

Sonymen qatar Qaısar Barjaqsynov Qaraǵandy oblystyq sybaılas jemqorlyqqa qarsy qyzmet óziniń «advokat» qyzmettik jaǵdaıyn paıdalanyp, aldaý jáne laýazymdy tulǵalarǵa para berýge ıtermeleý arqyly qylmystyq jaýapkershilikten jaltarýǵa kómekteskeni úshin «M» esimdi azamattyń 2 mıllıon teńge qarjysyn ıemdengen «B» azamatshasyna qatysty sotqa deıingi tergeýdi bastaǵanyn aıtty.