Para berýge árekettengeni úshin qandaı jaza qarastyrylǵan
ASTANA. KAZINFORM – Memlekettik qyzmetshi aqshany alýdan bas tartqan jaǵdaıda, oǵan az somada para berýge árekettengen adamǵa qylmystyq jaýapkershilik qarastyrylǵan ba? Bul suraqqa Astana qalalyq prokýratýrasy jaýap berdi.
— Zańdy negizder bolǵan jaǵdaıda, memlekettik qyzmetshi para alýdan bas tartqan kúnniń ózinde de qylmystyq jaýapkershilik bolýy múmkin. Zańsyz syıaqynyń mólsheri qylmystyq jaýapkershilikti júzege asyrýǵa kedergi bola almaıdy», – dedi elorda prokýrorynyń kómekshisi Nurdáýlet Abýov Astana qalasynyń kommýnıkatsııalar qyzmetindegi brıfıngide.
Osy oraıda ol naqty bolǵan oqıǵa boıynsha mysal keltirdi. Astanada qaralǵan qylmystyq isterdiń birinde bir azamat ákimshilik hattama toltyrylýynyń aldyn alý maqsatynda patrýldik polıtsııa qyzmetkerine 10 000 teńge usynǵan. Polıtsııa qyzmetkeri aqshany alýdan bas tartty. Atalǵan adamnyń áreketi para berýge oqtalý retinde saralandy. Sot oǵan aıyppul salyp, sonymen qatar belgili bir laýazymdardy atqarýǵa nemese belgili bir qyzmet túrlerimen aınalysýǵa ómir boıyna tyıym saldy.
— Bul mysal ákimshilik jaýapkershilikten zańsyz joldarmen jaltarýǵa áreket jasaýdyń áldeqaıda aýyr qylmystyq-quqyqtyq saldarǵa ákep soqtyrýy múmkin ekenin kórsetedi, — dep atap ótti prokýror.
Buǵan deıin habarlanǵandaı, Astana qalasynyń prokýratýrasy Qazaqstan zańnamasyna sáıkes qandaı áreketter sybaılas jemqorlyqqa baılanysty qylmystarǵa jatatynyn jáne olar úshin qandaı jaza qarastyrylǵanyn túsindirdi.