Para berýdi usynǵandarǵa qylmystyq jaýapkershilik engiziledi – zań jobasy

ASTANA. KAZINFORM – Qylmystyq kodekske para usynýdy jáne ony berýge ýáde etýdi krımınalızatsııalaý boıynsha túzetýler usynyldy. Bul týraly Májilistiń jalpy otyrysynda sybaılas jemqorlyqqa qarsy is-qımyl máseleleri boıynsha zań jobasyn talqylaý kezinde QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov málim etti.

- Para berýge ýáde etý ári para berýdi usyný úshin qylmystyq jaýapkershilik engizý eskerilgen. Bul - zań jobasynyń negizgi bastamalarynyń biri. Qylmystyq kodekske para usynýdy jáne ony berýge ýáde etýdi krımınalızatsııalaý boıynsha túzetýler, birinshiden, Sybaılas jemqorlyqqa qarsy saıasattyń 2022-2026 jyldarǵa arnalǵan tujyrymdamasyn iske asyrý jónindegi is-qımyl josparyn oryndaý úshin zań jobasyna engizilgen. Osy jospardyń 41-tarmaǵyna sáıkes, Agenttikke talǵan normalardy kaózdeıtin zań jobasyn Májiliske engizýdi qamtamasyz etý tapsyryldy. Ekinshiden, bul másele 16 jyldan beri kún tártibinde tur. 2008 jyly Qazaqstan ratıfıkatsııalaǵan BUU-nyń Sybaılas jemqorlyqqa qarsy konventsııasynda parany ýáde etýdi, usynýdy, bopsalaýdy qylmys sanatyna jatqyzý qajet ekeni qarastyrylǵan, - dedi U. Sarqulov.

Para usynýdy jáne ony berýge ýáde etýdi krımınalızatsııalaý boıynsha usynymdar Ekonomıkalyq yntymaqtastyq pen damý uıymy sarapshylarynyń esepterinde turaqty negizde qamtylǵan.

- Túzetýlerdi pysyqtaý barysynda alys jáne jaqyn shet elderdiń halyqaralyq tájirıbesi muqııat zerdelendi. Máselen, Ekonomıkalyq yntymaqtastyq jáne damý uıymynyń barlyq 38 elinde para usynǵany ári ony ýáde etkeni úshin qylmystyq jaýapkershilik bar, óıtkeni onyń zańnamada bolýy OESR-ge kirýdiń mindetti sharty sanalady. Bul norma postkeńestik aımaqtaǵy kóptegen memleketterdiń zańnamasynda da kózdelgen. Mundaı qylmystar boıynsha sheteldegi sot-tergeý praktıkasy mınımaldy, jekelegen jaǵdaılar ǵana anyqtalady, biraq osy sııaqty baptyń bolý faktisi tipti para týraly áńgimeniń ózi qolaısyz bolatyndaı tártipke keltiredi jáne tıisti mádenıetti qalyptastyrady. Para týraly ýaǵdalastyqty aıaqtalǵan qylmys dep taný aıqyn profılaktıkalyq áserge ıe bolady, bul memleketke zııan keltirgenge deıin paraqorlyqtyń jolyn kesýge múmkindik beredi, - dedi agenttik ókili.

Budan buryn habarlanǵandaı, bul zań jobasy aıasynda aýyr jáne asa aýyr sybaılas jemqorlyq qylmystar jasaǵany úshin sottalǵandardyń jarııa tizilimi engiziledi.