Para berý týraly ýáde nemese usynys úshin qylmystyq jaýapkershilik engizilmek

NUR-SULTAN. QazAqparat - Qazaqstannyń sybaılas jemqorlyqqa qarsy saıasatynyń kontseptsııasy sheńberinde zańnamalyq aktilerge jáne Ákimshilik quqyq buzýshylyq týraly kodekske ózgerister men tolyqtyrýlar engizý josparlanyp otyr, dep habarlaıdy QazAqparat QR Sybaılas jemqorlyqqa qarsy is-qımyl agenttigine silteme jasap.

Atap aıtqanda, adamdardy qosýdyń jáne odan shyǵarýdyń naqty tetikterin aıqyndaı otyryp, júıege sybaılas jemqorlyq jasaýshylardyń jarııa tizimin engizý kózdelip otyr.

Memlekettik qyzmet pen kvazımemlekettik sektorda múddeler qaqtyǵysyn anyqtaý jáne retteý reglamenttelmek.

Para berý týraly ýáde nemese usynys úshin qylmystyq jaýapkershilik engizý josparlanyp otyr.

Sondaı-aq, sybaılas jemqorlyqqa qarsy is-qımyl boıynsha sharalar qabyldamaǵany úshin jaýapkershiliktiń quqyqtyq tetikterin jetildirý, sybaılas jemqorlyq quqyq buzýshylyqtar jasaǵany úshin zańdy tulǵalardyń jaýapkershiligin kúsheıtý, sybaılas jemqorlyq ákimshilik quqyq buzýshylyqtar úshin eskirý merzimin ulǵaıtý, ÁQBtK-niń keıbir baptaryn ákimshilik sybaılas jemqorlyq quqyq buzýshylyqtarǵa jatqyzý, halyqaralyq kommertsııalyq mámilelerdi júzege asyrý kezinde sheteldik laýazymdy tulǵalardy paraǵa satyp alýǵa qarsy kúres jónindegi konventsııaǵa qosylý maqsatynda ÁQBtK-ge túzetýler engizý josparlanǵan.

«Kórsetilgen konsýltatıvtik qujattar 13 mamyrda jarııa talqylaý úshin «Ashyq NQA» ınternet-portalynda, sondaı-aq Agenttiktiń ınternet-resýrsynda ornalastyrylady. Konsýltatıvtik qujattardy talqylaý merzimi on bes jumys kúnin quraıdy jáne aǵymdaǵy jyldyń 2 maýsymyna deıin jalǵasady», - dep jazady Antıkor.

Agenttik konsýltatıvtik qujattardy kópshilik aldynda talqylaýǵa belsendi qatysýdy suraıdy.

Aıta ketsek, sybaılas jemqorlyq týraly habarlaǵandar 12 mln teńgege deıin syıaqy alady.