Para berý týraly tapsyrma bergen joqpyn - Serikbol Mýsınov

ALMATY. QazAqparat - Almatyda qalalyq Qoǵamdyq densaýlyq saqtaý basqarmasynyń eks-basshysy Serikbol Mýsınov sotta prokýratýra organdaryna para bermegenin aıtty, dep habarlaıdy QazAqparat tilshisi.

Mýsınovtyń aıtýynsha, ol prokýratýranyń tekserýden soń para talap etkenin qolastyndaǵy qyzmetkerlerden estigen.

«19 qyrkúıekte men ákimdikke barýym kerek bolatyn. Jolda birneshe ret belgisiz nómirden bireý telefon shaldy. Ǵalymjan (Mamyshev) esimdi prokýror habarlasqan eken. Basqarmany sol kisi teksergen. Ákimdiktiń aldynda maǵan kelip para týraly áńgime aıta bastady. 2016-2017-2018 jyldardaǵy qyzmetti tekserý úshin 20-25 myń AQSh dollary kóleminde para surady. Aınala shý bolǵan soń áńgimeniń barlyq túp-tórkinin túsine almadym», - dedi Serikbol Mýsınov.

Sonymen qatar, eks basshy óziniń qolastyndaǵy qyzmetkerler Serikbolov pen Boranbaeva para bergenin, ári ózine qarsy qylmystyq is qozǵalǵanyn kesh bilgenin aıtty.

«Suraq-jaýap uzaqqa sozyldy. Men kúızeliste boldym. Para alý týraly tapsyrma bergen joqpyn. Eger, meniń qolastymdaǵy qyzmetkerler para bergen bolsa, men de ózimniń aıypty ekenimdi túsinemin», - dedi ol.

Munyń aldyndaǵy sot otyrysynda Serikbol Mýsınov ózine taǵylǵan aıypty moıyndamaǵan bolatyn.

Eske salaıyq, Densaýlyq saqtaý basqarmasynyń burynǵy basshysy Serikbol Mýsınovqa qatysty para berdi degen kúdikpen is qozǵalǵan bolatyn.

Basqarma basshysy qyzmetinen 2018 jyly 20 qyrkúıekte bosatyldy. Ol qalalyq basqarmany 2017 jyldyń qarashasynan beri basqaryp kelgen edi. Qyzmet jolyn Shyǵys Qazaqstan oblysy Aıagóz aýdandyq aýrýhanasynda ıntern-dáriger bolyp bastaǵan. Ár jyldary Semeı oblysy Densaýlyq saqtaý basqarmasynyń basshysy, Astana qalasy Farmatsevtıkalyq baqylaý basqarmasynyń basshysy, Mańǵystaý oblysy Densaýlyq saqtaý basqarmasynyń basshysy qyzmetterin atqarǵan.