Para bergen de, alǵan da ustaldy

ASTANA. QazAqparat -  «Qazagrofınans» basshysy jáne oǵan para bergen JShS dırektory isti boldy.  Bul týraly búgin Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Nurlan Jahın málim etti, dep habarlaıdy QazAqparat tilshisi.

«Qostanaı oblystyq sybaılas jemqorlyqqa qarsy is-qımyl ulttyq bıýrosy jedel-izdestirý sharalaryn júrgizý barysynda Qostanaı oblysy boıynsha «Kazagrofınans» AQ basshysynyń paraqorlyǵyn áshkereledi. Ol aýyl sharýashylyǵy tehnıkasyn jáne jabdyqty satyp alýdy qarjylandyrý máselesi boıynsha oń sheshimdi jedeldetilgen túrde qabyldaý úshin oblystyń agroónerkásip óndirýshilerinen júıeli negizde para alǵandyǵy úshin kúdikke ilinýde», - dedi ol.

Resmı ókildiń dereginshe, paranyń jalpy somasy 1 000 000 teńgeni quraıdy. Kúdikti atalǵan somany 2018 jylǵy maýsym-tamyz aılary aralyǵynda alǵan.

«Jalpy para alýdyń 5 faktisi tirkelgen. Qazirgi tańda kúdikti úıqamaqqa alyndy. Sondaı-aq JShS-sy dırektory jaýapkershilikke tartylýda. Ol Qazagrofınans basshysyna para berý boıynsha kúdikke ilingen. Atalǵan faktiler boıynsha sotqa deıingi tergeý amaldary júrgizilýde», - dedi Nurlan Jahın.