Para bergen: Aqtóbede sottalǵan bilim bóliminiń basshysyna taǵy bir aıyp taǵyldy

Buǵan deıin para alǵany úshin sottalǵan Aqtóbe oblysy Yrǵyz aýdandyq bilim bóliminiń basshysy Aıbek Aldanovqa taǵy bir epızod boıynsha aıyp taǵylyp, onyń jazasy aýyrlady, dep habarlaıdy Kazinform.

Yrǵyz aýdandyq sotynda Aıbek Aldanovqa qatysty ekinshi is qaraldy. Іs materıalyna súıensek, atalǵan aýdannyń bilim bóliminiń basshysy tekserý jumystaryn júrgizgen «Aqtóbe oblysynyń eńbek jáne áleýmettik qorǵaý departamenti» RMM Halyqty áleýmettik qorǵaý salasyndaǵy baqylaý bóliminiń basshysy Asqar Muhıtovqa 25 myń teńge para bergen. A.Muhıtov bilim bólimi ǵımaratynda pandýs jáne taktıldi belgiler joqtyǵyn anyqtaǵan. Parany osy faktini jasyryp qalý úshin alǵan.

Buǵan deıin eshqaıda ketpeý jáne tıisti minez-qulyq týraly qolhatpen júrgen A.Muhıtov Qylmystyq kodekstiń «Para alý» baby boıynsha aıypty dep tanylyp, oǵan 3 jylǵa bas bostandyǵynan aıyrý jazasy taǵaıyndaldy. Jazany qylmystyq-atqarý júıesiniń ortasha qaýipsiz mekemesinde óteıdi. Sondaı-aq budan bylaı memlekettik qyzmette, bank salasynda eńbek ete almaıdy.

Al Yrǵyz aýdandyq bilim bóliminiń basshysy A.Aldanov Qylmystyq kodekstiń «Para berý» babymen aıypty dep tanyldy. Sot 2 jyl bas bostandyǵynan aıyrý jazasyn belgiledi. Buǵan deıin «Para alý» babymen sottalǵan ol Qylmystyq kodekstiń 58-baby 6-bóliginiń negizinde túpkilikti 4 jylǵa bas bostandyǵynan aıyryldy. Jazany óteýge qylmystyq-atqarý júıesiniń ortasha qaýipsiz mekemesine joldanady.

Sot úkimi zańdy kúshine engen joq.