Para Azııa oıyndarynyń jeńimpazdaryna qurmet kórsetildi
ASTANA. QazAqparat - Búgin Astanada Indonezııada ótken ІІІ Para Azııa oıyndarynyń júldegerlerin qurmetteý rásimi ótti, dep habarlaıdy QazAqparat tilshisi.
Jakartadaǵy Para Azııa oıyndarynda elimizdiń sportshylary júlde sanynyń rekordty kórsetkishine qol jetkizdi. Qazaqstan qorjynynda 6 para sport túrinen (para júzý, para dzıýdo, para paýerlıftıng, para jeńil atletıka, para voleıboldy otyryp oınaý jáne shahmat) 33 medal, onyń ishinde 5 altyn, 15 kúmis, 13 qola júlde bar. Odan bólek 4 sport boıynsha parasportshylarymyz alǵash ret júldege ıe boldy. Sonymen qatar tuńǵysh ret komandalyq oıynda para voleıbolshylarymyz qola medal oljalady.
«Búgingi kún erekshe, óıtkeni elimizdiń kók baıraǵyn halyqaralyq deńgeıde bıik ustap, tabysty jeńisterimen qýantqan sportshylarymyzǵa qurmet kórsetýdemiz. Bul tek sportshylarymyzdyń ǵana emes, búkil qazaq halqynyń jetistigi. Ózderińiz biletindeı, elimizde sportqa kóp mán berilýde, ásirese buqaralyq sportqa. Elbasy bıylǵy joldaýynda aýyldyq jerlerde dene shynyqtyrý ortalyqtaryn damytý kerek degen naqty tapsyrma berdi. Bul maqsatta tıisti sharalar búginnen bastap qolǵa alynýda», -dedi QR Mádenıet jáne sport mınıstri Arystanbek Muhamedıuly. 
Bıylǵy Azııa oıyndary jeńimpazdaryna berilgen syıaqy somasy 1 oryn ıelengen sportshyǵa - 10 myń dollardy, 2 orynǵa - 5 myń dollardy jáne 3 orynǵa - 3 myń dollardy quraıdy.
Saltanatty shara jeńimpaz sportshylardy marapattaý men merekelik kontsertke ulasty.
Aıta ketsek, ІІІ Para Azııa oıyndary ústimizdegi jyldyń 6-13 qazan aralyǵynda Indonezııanyń Jakarta qalasynda ótti. Sport básekesine álemniń 43 elinen 3 myńnan asa sportshy qatysty.
