Para Azııa oıyndary: Elimizdiń qorjynynda 9 júlde bar

ASTANA. QazAqparat - Jakartada ótip jatqan ІІІ Azııa para oıyndarynyń ekinshi kúngi nátıjesi boıynsha Qazaqstan qorjyny taǵy 7 medalmen tolyqty, dep habarlaıdy QazAqparat tilshisi QR Ulttyq paralımpıada komıtetiniń baspasóz qyzmetine silteme jasap. 

Indonezııadaǵy para oıyndardyń ekinshi kúni sportshylarymyz 4 kúmis jáne 3 qolany qanjyǵalaryna baılady. Alǵashqy kúmisti parapaýerlıftıng boıynsha 54 keli salmaqta Davıd Degtıarev ıelense, keıingi úsh kúmisti Zúlfııa Gabıdýllına (50 metrge arqamen júzý), dzıýdodan Azamat Turymbetov jáne 100 metrge erkin júzýden Dmıtrıı Lı enshiledi.

Qola medaldardy Sııazbek Dalıev (50 metrge arqamen júzý), Mansurbek Ibrashev (100 metrge erkin júzý) jáne 50 kelige deıingi para paýerlıftıngten Gúlbaný Ábdihalyqova oljalady.
Elimizdiń qorjynyna alǵashqy medaldy parapaýerlıftıngten Alına Solodýhýna (qola medal) men para júzýden Dmıtrıı Lı (qola medal) tartý etken bolatyn. 
Osylaısha Qazaqstannyń qorjynynda para oıynnan 4 kúmis jáne 5 qola barlyǵy 9 medal bar.
Aıta keteıik, ІІІ Azııa para oıyndaryna álemniń 43 elinen, 3 myńnan asa sportshy qatysýda, Qazaqstannan osy jolǵy para oıyndarǵa rekordty kólemde sportshy apardy, atap aıtqanda 9 sport túrinen 91 sportshy.
Eske salsaq, para oıyndardyń tikeleı kórsetilimin Qazsport telearnasynan kórýge bolady.