Para Azııa oıyndary: 61 jastaǵy qazaqstandyq kúmis medal aldy
ASTANA. QazAqparat - Indonezııa astanasy Jakarta qalasynda ótip jatqan ІІІ Para Azııa oıyndarynda qazaqstandyq 61 jastaǵy shahmat sheberi Bolat Qabyjanov el qorjynan kezekti kúmis medaldi saldy, dep habarlaıdy QazAqparat tilshisi.
Bul týraly QR Mádenıet jáne sport mınıstrligi Sport jáne dene shynyqtyrý isteri komıtetiniń baspasóz hatshysy Raýhan Toǵymbaeva Feısbýk paraqshasynda jazdy.
«Bolat Qabyjanov ІІІ Para Azııa oıyndarynyń kúmis medalin utyp aldy. Bolat aǵanyń jasy 61-de. Ol budan buryn shahmattan sańyraýlar-mylqaýlar arasynda ótken Álem chempıonatynda kúmis medal alǵan bolatyn. Ol jarys 2012 jyly Almatyda ótken edi», - dep jazady Raýhan Toǵymbaeva.
Aıta keterligi, shahmat bıyl Para Azııa oıyndaryna birinshi ret engizilip otyr.
Eske sala ketsek, qazaqstandyq para júzýshiler Indonezııa astanasy Jakarta qalasynda ótip jatqan ІІІ Para Azııa oıyndarynda besinshi altyn medaldy jeńip alǵanyn budan buryn jazǵan edik.
