Para-armrestlıngten álem chempıony Pavel Nıkıforov Paralımpıada jattyǵý ortalyǵynda boldy
NUR-SULTAN. QazAqparat - Para-armrestlıngten álem chempıony Pavel Nıkıforov Paralımpıadalyq jattyǵý ortalyǵynyń jumysymen tanysty, dep habarlaıdy QazAqparat.
Ol para atletterge árqashan ózderine senip, alǵa qoıǵan maqsattaryna jetýge tilektestik bildirdi.
6 qarashada jankúıerler elordanyń áýejaıynda para-armrestlıngten álem chempıony Pavel Nıkıforovty qarsy aldy. Sportshy 60 kelige deıingi salmaq dárejesinde 12 kezdesý ótkizip, fınalda Reseı ókilin jeńip shyqty.
«Álem chempıonaty óte qıyn boldy, qarsylastar álemniń túkpir-túkpirinen keldi. Jarysta meni Qazaqstan qoldady. Bizdiń elimizden adam kóp boldy. Biz bir-birimizdi qoldadyq. Bul meniń álem chempıonatyndaǵy alǵashqy jetistigim. Osyǵan deıin Qazaqstan jáne Azııa chempıonattarynda altyn medaldar jeńip alǵanmyn. Kelesi jarys — Qazaqstan Chempıonaty — naýryzda álem birinshiligine irikteý bolady. Meniń eki dúrkin álem chempıony bolǵym keledi. Óz jeńisimdi anama arnaımyn, búgin onyń týǵan kúni», - dedi Nıkıforov.
Pavel 12 jastan bastap sportpen aınalysady jáne álem chempıonatyndaǵy altyn medali úshin 22 jyl eńbek etti.
Álem chempıonatyna deıin ol Qazaqstannyń úsh dúrkin jáne Azııanyń eki dúrkin chempıony bolǵan.
Pavel Qaraǵandyda turady, sonda jumys isteıdi.
«Sporttan bólek, men KazMetiz metall zaýytynda júk tıeýshi bolyp jumys isteımin. Álem chempıonatyna barýyma kómektesken zaýyt dırektoryna alǵysymdy bildiremin», - dedi Nıkıforov.
Qazaqstan quramasy Rýmynııada ótken armrestlıng jáne para-armrestlıngten Álem chempıonatynda el qorjynyna 134 medal saldy. Jalpy nátıje boıynsha, Qazaqstan quramasy 2 orynda: 51 altyn, 40 kúmis jáne 43 qola.
Jarysqa álemniń 54 memleketinen 1400 sportshy qatysty.
Múmkindigi shekteýli qol kúresshilerimiz 8 altyn, 7 kúmis jáne 11 qola medal jeńip aldy.
