Para alyp ustalǵan úsh polıtseıdiń vıdeosy jarııalandy
Agenttiktiń resmı ókili Janna Bastarovanyń aıtýynsha, Aqtóbe qalasynda Astana aýdandyq polıtsııa bólimi bastyǵynyń jedel jumys boıynsha orynbasary, osy bólimniń aǵa jedel qyzmetkeri jáne taǵy bir jedel qyzmetkerdiń para alý faktisi anyqtaldy. Bastyqtyń orynbasary - polıtsııa maıory, jedel qyzmetkerler - polıtsııa kapıtany jáne aǵa leıtenant.
«Olar aldyn ala sóz baılasyp, bir azamattyń ulyn qylmystyq jaýapkershilikke tartpaǵany úshin 300 myń teńge somasynda para alǵany úshin kúdiktelip otyr. Óz kinásin tolyq moıyndaýyna baılanysty bir jedel qyzmetkerge qatysty úıqamaqqa alý túrindegi bultartpaý sharasy qoldanyldy. Ekinshisine qatysty bultartpaý sharasy qabyldanǵan joq. Al bastyqtyń orynbasaryna qatysty kúzetpen ustaý túrindegi bultartpaý sharasy qoldanyldy. Tergeý jalǵasýda», - dedi J.Bastarova Astanada ótken baspasóz máslıxatynda.
Aıta keteıik, búgingi brıfıngte taǵy bir zań buzýshylyq týraly aıtyldy. "Astana qalasy boıynsha kólik jáne jol-kólik ınfraqurylymyn damytý" memlekettik mekemesiniń bólim basshysyna qatysty qylmystyq is tergelýde. Ol basqarma basshysynyń kelisimin almaı, onyń elektrondy tsıfrlyq qoltańbasyn paıdalaný arqyly merdigerdiń esepshotyna 414 mıllıon teńgeniń bıýdjet qarajatyn zańsyz aýdarǵan. Al Almaty oblysy Uıǵyr aýdany ákiminiń orynbasary óz kabınetinde paramen ustaldy.