Para alyp sottalǵan Erlan Bilál akter bolyp jumys isteı bermek
ASTANA. QazAqparat - Erlan Bilál teatrdyń akterler quramynda jumysyn jalǵastyra bermek. Bul týraly Muhtar Áýezov atyndaǵy Qazaq memlekettik akademııalyq drama teatrynyń jańa basshysy Ashat Maemırov aıtty, dep habarlaıdy Almaty arnasy.
Buǵan deıin QazAqparat atalǵan teatrǵa jańa dırektor taǵaıyndalǵandyǵy týraly habarlaǵan bolatyn.
Ashat Maemırov jańa qyzmetke taǵaıyndaý týraly buıryq shyqqannan keıin, uly tulǵalardyń basyna baryp zııarat etkenin de jasyrmady. Al ónerde áriptes, ómirde dosy teatrdyń burynǵy basshysy Erlan Biláldiń qara shańyraqtyń sahnasyndaǵy jumysyn jalǵastyra beretindigin basa aıtty. Óıtkeni, Erlan Bilálden basqa akter somdaı almaıtyn onyń ózindik rólderi bar.
«Erlan osy teatrdaǵy negizgi repertýarlardy basty keıipkerlerdi somdaıdy. Ol Muhtar Áýezovtyń «Abaı jolyndaǵy» Abaı, ony Erlannan basqa eshkim oınaı almaıdy. Ol Dýlat Isabekovtyń «Jaý júregindegi» Balýan Sholaq, Israıl Saparbaevtyń «Syǵan serenadasyndaǵy» Shámshi beınesi, Ákim Tarazıdyń «Aqyn perishte mahabbattaǵy» Muqaǵalı beınesi. Erlannyń birinshi Alla Taǵala bergen talanty, artıstızm, kásibı sheberligi, naǵyz ónerdegi tulǵa. Sondyqtan tulǵa teatrdan bólinip eshqaıda ketpeıdi», - dedi Muhtar Áýezov atyndaǵy Qazaq memlekettik akademııalyq drama teatrynyń dırektory.
Eske sala keteıik, Almatyda M.Áýezov atyndaǵy qazaq memlekettik akademııalyq drama teatrynyń burynǵy dırektory, belgili akter Erlan Bilál 1,5 mln teńge kóleminde para alyp jatqan jerinen ustalǵan bolatyn.
Sondaı-aq, Erlan Bilálǵa qatysty sot úkimi shyqty.
