Para alýǵa ıtermelegen memqyzmetker ustaldy - Qyzylorda
NUR-SULTAN. QazAqparat - Qyzylorda oblysynyń ádilet departamentiniń ishki qaýipsizdik máselelerine jaýapty laýazymdy tulǵa ustaldy, dep habarlaıdy QazAqparat tilshisi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń baspasóz qyzmetine silteme jasap.
Tergeýdi Sybaılas jemqorlyqqa qarsy is-qımyl ulttyq bıýrosynyń Qyzylorda oblysy boıynsha departamenti júrgizýde.
«Ol adam óz qyzmettik boryshy boıynsha memlekettik mekemede sybaılas jemqorlyq kórinisteriniń jolyn kesýge mindetti bolǵan. Alaıda ol keri áreket jasaǵan. Naqtyraq aıtqanda, bir memqyzmetshiniń ústinen qozǵalǵan isti qysqartýǵa ýáde berip, isti jabý úshin SJQІUB-nyń laýazymdy tulǵalaryna 5 mln teńge bergizbek bolǵan. Ustalǵan Qyzylorda oblysynyń ádilet departamentiniń ishki qaýipsizdik máselelerine jaýapty laýazymdy tulǵanyń ústinen alaıaqtyq jáne para alýǵa ıtermeleý qylmystary boıynsha aıyp taǵyldy», - delingen habarlamada.
Kinásin tolyq moıyndaýyna baılanysty sot sanktsııasy boıynsha kúdiktige qatysty «úıqamaqqa alý» túrindegi bultartpaý sharasy qabyldanǵan. Tergeý jalǵasýda.
