Para alýdan bas tartqan qostanaılyq polıtseıler marapattaldy
Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysy boıynsha departamenti ótken jyldy qorytyndylap, 2019 jyldyń jumys josparyn talqylady.
«Otyrys barysynda 2018 jyly atqarylǵan jumystarǵa esep berildi. Memlekettik qyzmet salasyndaǵy ózekti jańalyqtar talqylandy. Birqatar jobalyq keńseler men qoǵamdyq uıymdardyń eseptik baıandamalary tyńdaldy. Solardyń biri - «Qostanaı - adaldyq alańy» jobalyq keńsesi. Olar bıyl birinshi ret «Adal júrek» tósbelgisin tapsyrdy», - dedi vedomstvonyń baspasóz hatshysy Aıda Bajırova agenttik tilshisine.
«Adal júrek» tósbelgisi memlekettik qyzmetke adaldyq tanytqan qyzmetkerlerge tapsyrylady. Sonymen, qurmetti marapatqa birinshi bolyp Qostanaı oblysy polıtsııa departamenti rota komandıriniń mindetin atqarýshy, polıtsııa aǵa leıtenanty Danııar Ermaǵanbetov pen vzvod komandıri, aǵa leıtenant Qajymurat Jumaǵazınov laıyq dep tanyldy. Olar jumys barysynda para alýdan bas tartqan.
Eske salsaq, «Qostanaı - adaldyq alańy» jobalyq keńsesi byltyr jeltoqsan aıynda ashylǵan. Basty maqsat - turmystyq sybaılas jemqorlyqtyń jolyn kesip, onyń deńgeıin tómendetý jáne azamattarǵa qolaıly jaǵdaı jasaý. Bul turǵyndarǵa qajetti qyzmet túrin kedergisiz alýǵa jol ashady. Azamattar sybaılas jemqorlyqqa qatysty derekterdi osy jerge habarlaýǵa bolady.
