Para alý, esirtki jasaý, qamaý: Almaty oblysynda qyzmetin asyra paıdalanǵan 5 polıtseı sottaldy

TALDYQORǴAN. QazAqparat – Almaty oblysynyń qylmystyq ister boıynsha mamandandyrylǵan aýdanaralyq soty birneshe qylmysqa kináli dep tanylǵan burynǵy 5 polıtseıge qatysty aıyptaý úkimin shyǵardy, dep habarlaıdy QazAqparat tilshisi.

Almaty oblystyq sotynyń baspasóz qyzmeti habarlaǵandaı, sot úkimi 2021 jylǵy 28 maýsymda shyǵarylǵan.

Olar:

1) esirtki quraldaryn, psıhotroptyq zattardy ótkizý maqsatynda laýazymdy tulǵanyń qyzmettik jaǵdaıyn paıdalana otyryp, adamdar tobynyń aldyn ala sóz baılasýymen zańsyz daıyndaǵany, qaıta óńdegeni, satyp alǵany, saqtaǵany jáne tasymaldaǵany (QR QK 297-baby 3-bóliginiń 1), 4) tarmaqtary);

2) birneshe ret qorqytyp alý jolymen, adamdar tobynyń aldyn ala sóz baılasýymen para alǵany (QR QK 366-baby 3-bóliginiń 1), 2), 4)-tarmaqtarymen);

3) laýazymdyq ókilettikterin teris paıdalanǵany (361-baptyń 1-bóligi);

4) Kórineý zańsyz ustap alǵany, kúzetpen qamaýǵa alǵany nemese kúzetpen ustaǵany (QR QK 414-babynyń 1-bóligi);

5) laýazymdy adam óziniń qyzmet babyn paıdalana otyryp jasalǵan alaıaqtyq áreketteri (QR QK 190-baby 2-tarmaǵy), 3-bóligi) úshin aıyp taǵyldy.

Sot olardy taǵylǵan aıyptar boıynsha kináli dep tanyp, qylmystyq quqyq buzýshylyqtardyń jıyntyǵy boıynsha qylmystyq jaýaptylyq pen jazany jeńildetetin jáne aýyrlatatyn mán-jaıdy eskere otyryp, sottalǵan adamnyń qylmys jasaýǵa qatysý róline, dárejesine qaraı 2 jyldan 12 jylǵa deıin bas bostandyǵynan aıyrý jazasyn taǵaıyndady.

Sottyń bul úkimimen kelispegen sottalýshylar apellıatsııalyq shaǵym túsirdi.