Para alǵany úshin túrmege qamalǵan Aıagózdiń burynǵy ákimi merziminen buryn bosady
ÓSKEMEN. QazAqparat – Para alǵany úshin túrmege qamalǵan Shyǵys Qazaqstan oblysy Aıagóz qalasynyń burynǵy ákimi merziminen buryn bosap shyqty, dep habarlaıdy QazAqparat tilshisi.
Semeı qalalyq №2 soty baspasóz qyzmetiniń málimetine súıensek, Q.esimdi sottalǵannyń bas bostandyǵynan aıyrý jazasyn aıyppul tóleýge aýystyrý týraly ótinishi boıynsha materıal qaraldy. Aıagóz qalasynyń burynǵy ákimi ótinishhatynda jazanyń bir bóligin ótegenin jazǵan.
«Túrmede otyrǵan kezde ol ózin jaqsy qyrynan kórsetti. Sot úkimi boıynsha protsessýaldyq shyǵyndardy tóledi, azamattyq talaptary bolmady. Tárbıelik is-sharalarǵa da belsendi qatysty. Sottalǵan azamat qamaýda ustaýdyń jeńildetilgen jaǵdaılaryna aýystyrylǵan», - delingen aqparatta.
Osylaısha, sot sheshimimen eks-ákimniń ótinishi qanaǵattandyryldy.
Esterińizge sala ketsek, iri kólemde para alǵan Aıagóz qalasy ákiminiń túrmege qamalǵandyǵyn habarlaǵan bolatynbyz.
