Para alǵany úshin aıyptalǵan QR UQK Shekara qyzmetiniń maıory 10 jylǵa sottaldy
ASTANA. QazAqparat - Búgin Astana qalasyndaǵy Qylmystyq ister jónindegi mamandandyrylǵan aýdanaralyq áskerı sotynda maıor B.O.Jaılybekovke jáne qatardaǵy alty sarbaz: A.J.Elýbaev, K.J.Joldyǵarın, A.S.Isekov, B.S.Sultanǵalıev, K.N.Shaımerdenov, B.E.Áıtimovke qatysty qylmystyq iske qatysty sot úkimi jarııalandy, dep habarlanǵan QR Áskerı sotynyń saıtynda.
«Atalǵan áskerı qyzmetshiler Qazaqstan Respýblıkasy shekarasyn kesip ótýshi tulǵalardan shekaradan kedergisiz ótkizý úshin uıymdasqan qylmystyq top quramynda, qorqytý arqyly qomaqty mólsherde para aldy dep aıyptalǵan bolatyn. 2014 jyldyń shilde aıynan 1 qazanǵa deıingi ýaqyt aralyǵynda Jaılybekov qurǵan jáne basshylyq etken uıymdastyrylǵan qylmystyq top 6 603 720 tenge kóleminde aqshany para retinde alǵan», delingen habarlamada. Sot úkimimen B. Jaılybekov on jylǵa bas bostandyǵynan aıyrý, oǵan tıesili jeke nemese birlesken ortaq menshik úlesindegi múlkin tárkileýmen jazasyn qatań rejimdegi túzeý kolonııasynda óteýge sottaldy. Sondaı-aq ol belgilengen memlekettik laýazymdy atqarý quqyǵynan alty jylǵa aıyryldy. K.Joldyǵarın oǵan tıesili jeke nemese birlesken ortaq menshik úlesindegi múlkin tárkileý, tórt jylǵa bas bostandyǵynan aıyrýǵa sottaldy, jazasyn qatań rejimdegi túzeý kolonııasynda óteıdi. Sonymen qatar ol belgilengen memlekettik laýazymdy atqarý quqyǵynan tórt jylǵa aıyryldy.
A.Elýbaev úsh jylǵa bas bostandyǵynan aıyrý, oǵan tıesili jeke nemese birlesken ortaq menshik úlesindegi múlkin tárkileý, jazasyn qatań rejimdegi túzeý kolonııasynda óteýge sottaldy. Elýbaev belgilengen memlekettik laýazymdy atqarý quqyǵynan tórt jylǵa aıyryldy. Budan basqa, sot B.Jaılybekovti «maıor» áskerı ataǵynan, K.Joldyǵarındi «aǵa serjant», A.Elýbaevty «serjant» áskerı ataqtarynan aıyrdy. Joǵaryda atalǵan tulǵalarǵa qatysty qamaý túrindegi bultartpaý sharasy ózgerissiz qaldyryldy. A.S.Isekov, B.S.Sultanǵalıev, K.N Shaımerdenov jáne B.E.Áıtimov QR QK-niń 235-babynyń 3-bóligimen, 366-babynyń 4-bóligimen aıypty dep tanylyp, belsendi ókinish bildirgeni úshin QR QK-niń 65-babynyń talaptaryna saı qylmystyq jaýapkershilikten bosatyldy. Olardyń eshqaıda ketpeý jáne ózin durys ustaý týraly qolhattarymen bekitilgen bultartpaý sharasy úkim zańdy kúshine engennen keıin joıylatyn bolady. Úkim zańdy kúshine engen joq.
