Para alǵany úshin ustalǵan astanalyq jedel járdemniń eks-basshysy 36 mln teńge aıyppul tóleıdi
ASTANA. KAZINFORM - Para alǵany úshin qamaýǵa alynǵan «Astana qalalyq jedel medıtsınalyq járdem stantsııasy» ShJQ MKK basshysy Murat Orazbaevqa qatysty sot úkimi shyqty.
«Astana qalasynyń qylmystyq ister jónindegi aýdanaralyq soty para alý faktisi boıynsha O. men M.-ǵa qatysty qyzmettik erejeni paıdalana otyryp, paraqorlyqqa deldal bolý isin qarady. Jedel medıtsınalyq qyzmet kórsetý stantsııasynyń basshysy O. 2022-2023 jyldary bas feldsher M.-dan medıtsınalyq kolledjderde oqý praktıkasyn aqyly negizde júrgizýge múmkindik bergeni úshin jáne medıtsınalyq kolledjderden jalaqy retinde óz shotyna aýdarý jolymen 676 myń teńge somasynda para aldy. Sondaı-aq, ol 2023 jyldyń sáýir aıynda JShS dırektorynyń orynbasarynan bas feldsher M.-nyń deldal bolýy arqyly jedel járdem stantsııasy janyndaǵy akademııa stýdentteriniń óndiristik praktıkadan oıdaǵydaı ótkeni úshin 100 myń teńge kóleminde aqshalaı para alǵan», — dep jazdy vedomstvodan.
Sot úkimimen O. QK-niń 366-baby 3-bóliginiń 4-tarmaǵy boıynsha birneshe ret para alǵany úshin kináli dep tanylǵan. Ol memlekettik qyzmette qyzmet etý quqyǵynan ómir boıyna aıyrylyp, para somasynyń 46,6 eselengen mólsherinde 36,1 mln teńge somasynda aıyppul túrindegi jaza taǵaıyndaldy. Sonymen qatar, ony memlekettik nagrada — «Qurmet» ordeninen aıyrý týraly usynys engizildi.
M. QK-niń 368-babynyń 2-bóligi boıynsha qyzmettik jaǵdaıyn paıdalana otyryp, para alǵany úshin kináli dep tanyldy. Memlekettik qyzmette qyzmet etý quqyǵynan ómir boıyna aıyra otyryp, 20 eselengen para somasy mólsherinde 2 mln teńge somasynda aıyppul túrindegi jaza taǵaıyndaldy.
Aıta keteıik, byltyrǵy jeltoqsanda Sybaılas jemqorlyqqa qarsy qyzmet astanalyq jedel járdem stansasynyń basshysy ustalǵanyn málimdegen.
