Para alǵany úshin sottalǵan Sátbaev qalasynyń eks-ákimi sot úkimine shaǵym túsirdi
SÁTBAEV. KAZINFORM – 10 mıllıon teńge para alǵany úshin sottalǵan Ulytaý oblysy Sátbaev qalasynyń burynǵy ákimi Shapaǵat Áýbákir sot úkimine apellıatsııalyq shaǵym túsirdi. Bul týraly sottyń baspasóz qyzmeti habarlady.
Ulytaý oblystyq sotynyń qylmystyq ister jónindegi sot alqasy Sátbaev qalalyq soty qalanyń eks-ákimi Sh.Áýbákirge jáne jeke kásipker D.Meıirbekke qatysty qylmystyq isti qarady.
Sonymen, 2024 jyldyń aqpan aıynda Sh.Áýbákir qala ákimi bola tura, Sátbaev qalasyndaǵy joldardy kútip ustaý jumystaryn júrgizetin jeke kásipker D.Meıirbekten memlekettik satyp alý shartynyń somasyn ulǵaıtýǵa jáne onyń keńeıýine járdemdesý úshin 10 mln teńge kóleminde para alǵan.
Sátbaev qalalyq sotynyń 2024 jylǵy 18 naýryzyndaǵy úkimimen Sh.Áýbákir Qazaqstan Respýblıkasy Qylmystyq kodeksiniń 366-babynyń 2-bóligimen kináli dep tanylyp, oǵan memlekettik qyzmette laýazymdardy atqarý quqyǵynan ómir boıyna aıyra otyryp, 3 jyl 6 aıǵa bas bostandyǵynan aıyrý jazasy taǵaıyndalǵan.
D.Meıirbek QR QK-niń 367 babynyń 2 bóligimen kináli dep tanylyp, oǵan memlekettik qyzmette laýazymdardy atqarý quqyǵynan ómir boıyna aıyra otyryp, paranyń jıyrma eselengen somasy – 200 mln teńge aıyppul taǵaıyndalǵan.
Oblystyq sottyń apellıatsııalyq sot alqasynyń qaýlysymen atalǵan úkim ózgerissiz, al sottalǵan Sh.Áýbákirdiń, onyń qorǵaýshysy-advokattyń apellıatsııalyq shaǵymy jáne prokýrordyń apellıatsııalyq ótinishhaty qanaǵattandyrýsyz qaldyryldy.
Esterińizge sala keteıik, 14 aqpanda Ulytaý oblysyna qarasty Sátbaev qalasynyń ákimi paramen ustaldy. Sybaılas jemqorlyqqa qarsy qyzmet Sátbaev qalasynyń ákimi QR QK 366-baby 2-bóligi boıynsha sotqa deıingi tergeý sheńberinde ustalǵanyn rastady.
Para alǵan Sátbaev qalasynyń burynǵy ákimi Shapaǵat Áýbákir 3,5 jylǵa sottaldy.
