Para alǵan temirtaýlyq burynǵy basshy 5 mln teńge aıyppul tóleıdi
QARAǴANDY. QazAqparat - Temirtaý qalalyq bilim bóliminiń basshysy Baqshagúl Rahımovaǵa para alǵany úshin 5 mıllıon 600 myń teńge kóleminde aıyppul salyndy, dep habarlaıdy «QazAqparat» HAA tilshisi.
Temirtaý qalalyq soty «Temirtaý qalalyq bilim bólimi» MM basshysy Baqshagúl Rahımova QR QK 366-baby 3-tarmaǵy «para alý» boıynsha aıypty dep tanydy. Ol óz kinásin moıyndap, Temirtaý prokýrory Arman Aqanovpen kinásin moıyndaıtyndyǵy týraly protsessýaldyq kelisim jasaǵan. «Sottalýshy Rahımova Baqshagúldi Qylmystyq kodekstiń 366-baby 2 jáne 3- tarmaqtary boıynsha kináli dep tanyp, oǵan alǵan paradan jetpis ese kóp aıyppul salýdy, ıaǵnı 5 mıllıon 600 myń teńge tóleý jazasyn taǵaıyndaımyn. Qosymsha jaza retinde onyń qylmystyq jolmen qol jetkizgen múlki tárkilenedi», - dedi Temirtaý qalalyq sotynyń sýdıasy Asanáli Smaıylov.
Budan bólek, ol ómir boıy memlekettik qyzmette laýazymdy qyzmet atqarý quqynan aıyryldy.
