Para alǵan orynbasary úshin basshy qyzmetinen ketti – CQO

PETROPAVL. QazAqparat – SQO-da ákimdiktiń basqarma jetekshisi qolastyndaǵy qyzmetkeri para alǵany úshin qyzmetinen ketti. Bul týraly Sybaılas jemqorlyqqa qarsy qyzmettiń jetekshisi Ernar Baıanǵazın aıtty, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken onlaın-brıfıngte Ernar Baıanǵazın oblystyq jolaýshylar kóligi jáne avtomobıl joldary basqarmasynyń basshysy Vladımır Balahontsevtiń óz erkimen jumystan ketkenin habarlady. Aqpan aıynda onyń orynbasary 200 myń teńge para alǵany úshin sottalǵan edi. E.Baıanǵazınniń aıtýynsha, saıası emes, ákimshilik memlekettik qyzmetshi tikeleı qolastyndaǵy qyzmetkeri sybaılas jemqorlyqqa jol bergen jaǵdaıda zań boıynsha tártiptik jaýapkershilikke tartylady.

«Petropavl qalalyq soty tótenshe jaǵdaılar departamentiniń bas mamanyna úkim shyǵardy. Departament tergeý júrgizdi. Órt sóndirý jáne apattyq-qutqarý jumystary qyzmetiniń bastyǵy Kólbaev jáne kadrlyq saıasat bóliminiń bastyǵy Nurtazın qatań sógis aldy», - dedi E.Baıanǵazın.

Vedomstvo jetekshisiniń aıtýynsha, memlekettik qyzmetshi jumystan shyǵý týraly ótinishti ózin laýazymǵa bekitken laýazymdy tulǵanyń atyna jazady. Al ótinishti qabyl alý-almaý - saıası qyzmetshini laýazymǵa taǵaıyndaǵan tulǵanyń quzyreti.