Para alǵan Oral qalasynyń bas sáýletshisi 7 jylǵa sottaldy
ORAL. KAZINFORM – Oral qalasy sáýlet jáne qala qurylysy bóliminiń burynǵy basshysy Muratbek Tashenbaev pen bas maman Nursultan Ǵataýǵa qatysty úkim shyqty.
Oral qalalyq sotynda qaralǵan qylmystyq is boıynsha olarǵa QR QK 366-baby 2-bóligi, 3-bóligi 4-tarmaǵy, 361-baby 4-bóligi 3-tarmaǵyna (para alý jáne laýazymdylyq ókilettikterdi teris paıdalaný) sáıkes aıyp taǵyldy. Sondaı-aq JShS dırektorynyń orynbasary Asyljan Kópbaev QR QK 367-baby 3-bóligi 3-tarmaǵymen (para berý) aıyptaldy.
Sot talqysynda málim bolǵanyndaı, 2023 jyly naýryzda A.Kópbaev sáýlet, qala qurylysy, qurylys qyzmeti jáne jer qatynastary salasynda ruqsat qujattaryn alý boıynsha jeke jáne zańdy tulǵalarǵa qyzmet kórsete júrip, qosymsha jer telimin alý máselesimen N.Ǵataýǵa jolyqqan.
Sodan keıin N.Ǵataýda qylmystyq oı paıda bolyp, jer komıssııasynda máseleniń oń sheshilgenin bilip, A.Kópbaevtan 500 myń teńge kóleminde para talap etken. JShS dırektorynyń orynbasary buǵan kelisken.
Sondaı-aq 2023 jyldyń sáýirinde N.Ǵataýǵa tanysy qosymsha jer telimine qol jetkizýge kómektesýin ótingen. Bas maman qylmystyq oıyn bólim basshysy M.Tashenbaevpen bólisken. Buǵan M.Tashenbaev kelisim berip, Ǵataýdyń tanysynyń ótinishin Oral qalasy ákimdigi janyndaǵy jer komıssııasy otyrysynda qaraý úshin jer qatynastary bólimine jazylǵan hatqa qol qoıǵan. Osylaısha, N.Ǵataý laýazymdyq ókilettikterin teris paıdalana otyryp, 2023 jyly aqpan men naýryz aralyǵynda tanysynan 5 mln teńge alǵan.
Іs munymen bitpeı, 2024 jyldyń qańtarynda A.Kópbaev taǵy bir tanysynyń atynan M.Tashenbaevtan Oral qalasynda úsh qabatty kóppáterli turǵyn úı qurylysynyń sáýlet-jospar tapsyrmasyn bekitip, eskızdik jobasyna kelisim berýin ótingen. Barlyq qujatty qaraǵannan keıin M.Tashenbaev kabınetinde A.Kópbaevtan 1 mln teńge talap etip, ol kóp oılanbaı kelisken.
M.Tashenbaev pen N.Ǵataýdyń laýazymdyq ókilettikterin teris paıdalanýy saldarynan memleketke asa iri kólemde 91 mln 968,453 myń teńge zalal keltirilgen.
Sottalýshylar kinásin moıyndap, jasaǵan áreketterine tolyq ókinetinin bildirdi.
M.Tashenbaev 7 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteıtin boldy. Buǵan deıin úıqamaqta bolǵan Tashenbaev sot zalynda tutqyndaldy.
N.Ǵataýǵa 3 jyl 6 aıǵa bas bostandyǵynan aıyrý jazasy kesildi. Eshqaıda ketpeý týraly qolhatpen júrgen onyń qolyna kisen salyndy. Para bergeni úshin A.Kópbaev 7 jylǵa bas bostandyǵynan aıyryldy. Kepilmen erkindikte júrgen ol da sot zalynda tutqyndaldy. Olardyń úsheýi de memlekettik qyzmet atqarý quqyǵynan ómir boıyna aıyryldy.
Sot úkimi kúshine engen joq.
Eske sala keteıik, budan buryn Batys Qazaqstanda aýyl turǵynyna 1,1 mln teńge zalal keltirgen alaıaq sottalǵanyn jazǵan bolatynbyz.