Para alǵan «Qara búrkit» túrmesiniń bastyǵy qamaýǵa alyndy — Qostanaı oblysy

QOSTANAI.QazAqparat - Qostanaı oblysy polıtsııa departamentiniń baspasóz qyzmeti Jitiqara túrmesi bastyǵynyń qamaýǵa alynýyna baılanysty túsinik berdi, dep habarlaıdy QazAqparat.

«Birlesken operatsııany Qostanaı oblysy polıtsııa departamenti men UQKD qyzmetkerleri júrgizdi.

Qostanaı oblysy boıynsha QAJD ÝK-161/3 tótenshe qaýipsizdik mekemesiniń bastyǵy sottalýshyǵa jalpy qamqorlyǵy úshin para alǵannan keıin ustaldy.

Qazirgi ýaqytta kúdiktige qatysty QR QK-niń 366-baby 3-bóligi «Para alý« boıynsha sotqa deıingi tergeý amaldary júrgizilýde. Kúdikti Qostanaı qalasynyń ýaqytsha ustaý ızolıatoryna qamaldy», delingen polıtsııa apparatynda.

Qostanaı oblysy PD basqarma bastyǵy Jánibek Qamzenovtyń aıtýynsha, quqyq qorǵaý organdarynda zań buzýshylyqtardy anyqtaý jáne jolyn kesý boıynsha jumys turaqty negizde júrgiziledi. Sondaı-aq sybaılas jemqorlyq táýekelderi taldanady. Jyl basynan beri ishki ister salasynyń 21 qyzmetkeri jumystan shyǵarylǵan. Taǵy 23 qyzmetker tártiptik jazaǵa tartylyp, laýazymynan bosatyldy.

Aıta keteıik, «Qara búrkit» túrmesi Jitiqara qalasynan 30 shaqyrym jerde ornalasqan. Jeke quramnan bólek, túrmeni ishki ásker qyzmeti kúzetedi.