Para alǵan, esirtki saqtaǵan: elorda ákimdiginiń qyzmetkeri sottaldy
ASTANA. KAZINFORM – Astana qalasy ákimdiginiń Qalalyq orta sapasy jáne baqylaý basqarmasynyń eńbek qatynastary bóliminiń bas mamany T. para alǵan jáne iri kólemde esirtki saqtaǵany úshin sottaldy. Úkimmen kelispegen sottalýshy apellıatsııalyq shaǵym túsirgen.
Astana qalasynyń qylmystyq ister jónindegi aýdanaralyq soty 2024 jylǵy 24 qazanda Astana qalasy ákimdiginiń Qalalyq orta sapasy jáne baqylaý basqarmasynyń eńbek qatynastary bóliminiń bas mamany T.-ǵa 15 mln teńge somasynda aıyppul túrindegi úkim shyǵardy.
Ol Qylmystyq kodekstiń 366-babynyń 2-bóligi (para alý), sondaı-aq 296-babynyń 3-bóligi boıynsha (iri mólsherdegi psıhotroptyq zattyń analogy metkatınondy (efedrondy) zańsyz ıemdengen jáne saqtaǵan) kináli dep tanyldy.
Sonymen qatar «M» JShS dırektory G. Qylmystyq kodekstiń 367-babynyń 2-bóligi boıynsha laýazymdy tulǵaǵa iri mólsherde para bergeni úshin sottalyp, 6,6 mln teńge somasynda aıyppul salyndy.
- Sondaı-aq sottalǵandarǵa memlekettik jáne kvazımemlekettik sektor sýbektilerinde laýazymdy qyzmet atqarý quqyǵynan ómir boıyna aıyrý túrindegi qosymsha jaza taǵaıyndaldy. Sot T.-nyń eńbek qatynastary bóliminiń bas mamany, ıaǵnı memlekettik eńbek ınspektor bola otyryp, «M» JShS-ǵa qatysty burynǵy jumyskshysynyń shaǵymy boıynsha tekseris júrgizbegeni jáne jaýapkershilikke tartpaǵany úshin «M» JShS-niń dırektory G.-dan 250 myń teńge para alǵany anyqtaldy, - delingen elorda soty shyǵarǵan úkimde.
Odan bólek, T. 2024 jylǵy shildede Astana qalasynda salmaǵy 0,08 gramm (iri mólsher) metkatınon (efedron) psıhotroptyq zatynyń analogyn zańsyz satyp alyp, zańsyz saqtaǵan.
- Sottalǵan T.-nyń advokaty úkimmen kelispeı, apellıatsııalyq shaǵym túsirip, taǵaıyndalǵan aıyppuldyń mólsherin azaıtýdy surady. Astana qalalyq sotynyń qylmystyq ister jónindegi sot alqasynyń qaýlysymen taǵaıyndalǵan jaza Qylmystyq kodekstiń jalpy bóliginiń talaptaryna sáıkes keletindikten birinshi satydaǵy sottyń úkimi ózgerissiz, apellıatsııalyq shaǵym qanaǵattandyrýsyz qaldyryldy, - dep habarlaıdy elorda sotynyń baspasóz qyzmeti.
Úkim zańdy kúshine endi.
Taıaýda Qyzylordada sottalǵan adamǵa kámpıt ishine jasyrylǵan esirtki ótkizbek bolǵan azamatsha ustalǵan edi.