Para alǵan elordalyq polıtseılerge sot úkimi shyǵaryldy

NUR-SULTAN. QazAqparat – 5 myń teńge para alǵan elordanyń polıtsııa qyzmetkerleri 350 myń teńge aıyppul tóleıtin boldy, dep habarlaıdy QazAqparat tilshisi.

Elordanyń Esil aýdandyq № 2 soty Nur-Sultan qalalyq Polıtsııa departamenti Jol-patrýldik polıtsııasy mamandandyrylǵan batalonynyń 2 ınspektoryna qatysty aıyptaý úkimin shyǵardy.

Atalǵan sottyń málimetine sáıkes, ınspektorlar T. men S. osy jyldyń 12 naýryzynda gaz jabdyǵyna ruqsatsyz qaıta jabdyqtalǵan kólikti basqarǵan azamat A.-dan ákimshilik jaýapkershilikke tartpaý úshin 5 000 teńge para alǵan. Sottalýshylardyń kinási qylmystyq is materıaldarymen dáleldenip otyr.

Al QR QK-niń 366-baby 3-bóliginiń 2-tarmaǵynda para alǵany úshin para kóleminiń 60-tan 70 eselengen somasyna deıin aıyppul salý, ne 7 jyldan 12 jylǵa deıingi merzimge bas bostandyǵynan aıyrý túrindegi jaza kózdelgen.

Prokýror para somasynyń 70 eselengen mólsherinde aıyppul túrinde jaza taǵaıyndaýdy suraǵan.

«Sot jazany jeńildetetin mán-jaı retinde sottalýshylardyń jas balalarynyń bar ekenin, shyn júrekten ókinýin eskerdi. Al qabyldanǵan antty buzýdy jaýaptylyqty aýyrlatatyn mán-jaı dep tapty. Olarǵa paranyń 70 eselengen somasy mólsherinde, ıaǵnı 350 myń teńge somasynda eń joǵary aıyppul túrindegi jaza taǵaıyndaldy. T. men S. ómir boıyna memlekettik qyzmetti atqarý quqyǵynan aıyryldy.

Úkim zańdy kúshine engen joq», - dep atap ótedi aýdandyq sottyń baspasóz qyzmetinen.