Para aldy dep kúdiktelip otyrǵan «Qazaqstan Ǵarysh Sapary» UK» AQ prezıdenti Ǵ.Myrzaqulov qyzmetinen shettetildi
ASTANA. 14 tamyz. QazAqparat - QR Ekonomıkalyq qylmysqa jáne sybaılas jemqorlyqqa qarsy kúres agenttigi «Qazaqstan Ǵarysh Sapary» Ulttyq kompanııasy» AQ-nyń prezıdenti Ǵ.T. Myrzaqulovqa qatysty qylmystyq is qozǵaýyna baılanysty ol
QR Ulttyq ǵarysh agenttiginiń (Qazǵaryshtyń) 2013 jylǵy 6 tamyzyndaǵy buıryǵymen qyzmetinen shettetildi. Bul týraly Qazǵaryshtyń baspasóz qyzmetinen habarlady.
«Qazǵaryshtyń 2013 jylǵy 6 tamyzdaǵy buıryǵy boıynsha «Qazaqstan Ǵarysh Sapary» Ulttyq kompanııasy» AQ prezıdentiniń mindetin atqarý kompanııanyń birinshi vıtse-prezıdenti M.R. Nurǵojınge júkteldi. Kompanııanyń iske asyrýdaǵy jobalary boıynsha oryndaýǵa tıis sharttyq mindetteri men jumys josparlarynyń saqtalýyna baǵyttalǵan sharalar qabyldandy», delingen taratylǵan málimette.
Eske salaıyq, 2013 jylǵy 1 tamyzda Qarjy polıtsııasy agenttiginiń qyzmetkerleri asa iri kólemde para aldy degen kúdikpen «Qazaqstan Ǵarysh Sapary» ulttyq kompanııasy» AQ prezıdenti Ǵ.Myrzaqulovty ustaǵan bolatyn.
Oǵan jalpy quny 15 mlrd. teńgeden asatyn Ǵarysh tehnıkasynyń arnaıy konstrýktorlyq-tehnologııalyq bıýrosyn qurastyrý-synaý kesheni qurylysynyń jumystaryn júrgizýge baılanysty ótken konkýrsta «Qulager» qurylys kompanııasy» JShS múddelerine áreket etip, sol úshin atalǵan kásiporynnyń basqarma tóraǵasy T.Egenbaevtan senimdi adamy - E.Asylbekov arqyly 272 myń AQSh dollary jáne 75 mln. 300 myń teńge kóleminde para aldy degen aıyp taǵylyp otyr.
«Qulager» QK» JShS-niń basqarma tóraǵasy T.Egenbaev jáne «Suńqar Kúzet» JShS dırektora Asylbekov te ustaldy.
Egenbaev asa iri kólemde para berdi dep, al Asylbekov para alýǵa kómektesti dep aıyptalýda.
3 tamyzda Murzaqulov pen Asylbekov sot sanktsııasymen qamaýǵa, Egenbaev - úıqamaqqa alyndy.
Qylmystyq is tergelýde, ózge aqparat tergeý múddesine baılanysty jarııalanbaıdy.
