Para aldy degen pavlodarlyq sheneýnik 2 aıǵa qamaldy
PAVLODAR. QazAqparat - Oblystyq aýyl sharýashylyǵy basqarmasynyń basshysy Oraz Dúzdenbaevtyń isine qatysty sotqa deıingi protsesiniń birinshi otyrysy ótti, dep habarlaıdy «QazAqparat» HAA tilshisi.
«Oraz Dúzdenbaev iri kólemdi para aldy degen kúdikpen ustalyp otyr», - dep habarlady Pavlodar oblysy sotynyń baspasóz qyzmeti.
№2 soty Oraz Dúzdenbaevty eki aıǵa, ıaǵnı 2018 jyldyń 16 qańtaryna deıin qamaýǵa alý týraly úkim shyǵardy.
Aıta keteıik, Oraz Dúzdenbaev ustalǵan bolatyn, al keshe Sybaılas jemqorlyqqa qarsy is-qımyl ulttyq bıýrosy sheneýniktiń ustalǵanyn rastady .
Keıbir málimetterge qaraǵanda, oblystyq aýyl sharýashylyǵy basqarmasynyń 48 jastaǵy basshysy Oraz Dúzdenbaev memleketten sýbsıdııa alyp otyrǵan sharýalardan meıramhanadaǵy kásibı mereke qurmetine arnalǵan saltanatty keshke tóleý úshin aqsha jınaǵan.
Pavlodar oblysy ákiminiń orynbasary Baýyrjan Qasenov juma kúni ótken Qazaqstan aýyl sharýashylyǵy qyzmetkerleri kúnine arnalǵan saltanatty jıynda qolastyndaǵy qyzmetkeriniń ne úshin aqsha jınaǵanynan beıhabar ekenin málim etti.
«Men ázirge esh nárse bilmeımin. Máseleni ulttyq bıýro (Sybaılas jemqorlyqqa qarsy is-qımyl ulttyq bıýrosy - red.) tekseredi. Sheshimdi solar qabyldaıdy», - dedi B.Qasenov.
