Para aldy dep aıyptalǵan Jambyl oblysynyń burynǵy ákimi aqtaldy
QONAEV. KAZINFORRM — Almaty oblysynyń qylmystyq ister jónindegi mamandandyrylǵan aýdanaralyq sotynda alqabıler «Qazseldenqorǵaý» mekemesiniń laýazymdy tulǵalaryna qatysty qylmystyq isti qarady.
«Qazseldenqorǵaý» memlekettik mekemesiniń burynǵy basshysy K. (Kárim Kókirekbaev — red.) men onyń orynbasary A. ózderiniń qyzmettik ókilettigine kiretin áreketi men áreketsizdigi úshin aldyn ala sóz baılasý arqyly bir top adammen birge asa iri mólsherde para alǵany úshin, sondaı-aq jalpy qamqorlyǵy úshin aıyptalǵan edi (QK 366-baby 3-bóliginiń 3-tarmaǵy).
Sonymen qatar, K-ǵa bir áreketti birneshe ret jasaǵany úshin aıyp taǵyldy (QK 366-babynyń 4-bóligi).
JShS dırektory P-ǵa aldaý jáne senimge qııanat jasaý arqyly múliktik zalal keltirdi, urlyq belgileri bolmaǵan kezde óziniń qyzmettik babyn paıdalanyp, iri kólemde zııan keltirdi (QK 195-babynyń 4-bóligi 2-tarmaǵy) jáne laýazymdy tulǵaǵa jeke basyna asa iri mólsherde aqsha túrindegi para berdi degen aıyp taǵyldy (QK 367-babynyń 4-bóligi).
2022 jylǵy 22 jeltoqsanda sottalýshy A. MM basshysynyń orynbasary bola tura óziniń qyzmettik múmkindikterin paıdalana otyryp, selden qorǵaý bógetterin salýǵa shart jasalǵan merdiger uıymnyń dırektory J-dan para alǵan.
Jumystyń oryndalǵany týraly aktilerge kedergisiz qol qoıý jáne jalpy qamqorlyq úshin para berýshi 397 621 AQSh dollarynan astam aqsha bergen.
Al sottalýshy P. JShS dırektory bola tura jumystyń oryndalǵany týraly aktilerge kedergisiz qol qoıý jáne jalpy qamqorlyq úshin MM basshysynyń orynbasaryna 397 621 AQSh dollary kóleminde para bergen.
Alqabıler alqasynyń sheshimi boıynsha (kópshilik daýyspen) K. ózine taǵylǵan aıyp boıynsha aqtaldy.
QK 366-babynyń 4-bóligi boıynsha kináli dep tanylǵan A-ǵa memlekettik qyzmet atqarý quqyǵynan ómir boıyna aıyra otyryp, 11 jylǵa bas bostandyǵynan aıyrý jazasy taǵaıyndaldy.
2022 jylǵy 5 jeltoqsandaǵy epızod boıynsha QK-niń 366-babynyń 4-bóligimen sottalýshy A. aqtaldy.
P. QK-niń 367-babynyń 4-bóligi boıynsha kináli dep tanylyp, memlekettik qyzmette laýazym atqarý quqyǵynan ómir boıyna aıyra otyryp, 11 jylǵa bas bostandyǵynan aıyryldy.
2022 jylǵy 5 jeltoqsandaǵy epızod boıynsha QK-niń 367-babynyń 4-bóligi jáne QK-niń 195-babynyń 4 bóliginiń 2 tarmaǵy boıynsha sottalýshy P. aqtaldy.
Úkim jarııalanǵan kúnnen bastap 15 táýlik ishinde aýdandyq sot arqyly Almaty oblystyq sotyna shaǵymdanyp, narazylyq bildirýge bolady.
Eske salaıyq, Kárim Kókirekbaev Qazseldenqorǵaý mekemesine basshylyq qyzmetten buryn Qazaqstannyń Qyrǵyzstandaǵy elshisi, Jambyl oblysynyń ákimi sekildi laýazymdardy atqarǵan.
