Rım Papasy «tırandar» týraly sóziniń Trampqa arnalmaǵanyn málimdedi

ASTANA. KAZINFORM – Rım Papasy Lev XIV «soǵysqa mıllıardtaǵan qarajat jumsaıtyn tırandar» týraly aıtqan sózinde AQSh prezıdentimen pikirtalas júrgizýdi kózdemegenin málimdedi, dep habarlaıdy VVS.

Pontıfıktiń aıtýynsha, ótken aptada aıtylǵan bul sóz eki apta buryn, ıaǵnı «prezıdent men týraly pikir bildirmeı turyp áldeqaıda erterek» jazylǵan. Bul týraly ol Angolaǵa ushyp bara jatqanda jýrnalısterge bergen suhbatynda aıtty.

– Degenmen, bul sózime men prezıdentpen taǵy da pikirtalasqa túskisi kelip otyr degendeı qarady. Al mende ondaı nıet múlde bolǵan joq, – dedi Papa.

Beısenbi kúni Kamerýnda sóılegen sózinde Lev XIV mıllıardtaǵan qarjyny qyryp-joıý men qıratýǵa jumsaýǵa kóz juma qaraıtyn, al emdeý, bilim berý jáne qalpyna keltirýge qajetti resýrstardy tappaı otyrǵan kóshbasshylardy synǵa aldy. Osy kezde onyń Donald Tramppen syrttaı pikir almasýy birneshe kún boıy jalǵasyp jatqan edi.

Buǵan deıin Tramp dúısenbi kúni Papany qylmys máselesinde álsiz jáne syrtqy saıasatta óte nashar dep ataǵan bolatyn.

Odan buryn Papa Tramptyń 8 sáýir keshinde «ıran órkenıeti joıylady» degen málimdemesin synǵa alǵan edi. Keıin AQSh pen Iran ýltımatým merzimi aıaqtalar sátte bitimge kelgenin jarııalaǵan.

Osyǵan baılanysty Kamerýndaǵy sózdi kópshilik Trampqa baǵyttalǵan dep qabyldap, AQSh prezıdenti oǵan jaýap berip úlgerdi.

– Papa qalaǵanyn aıta alady, men de onyń erkin sóıleýin qalaımyn, biraq onymen kelispeýim múmkin, – dedi Tramp.

Aıta keteıik, Papa men AQSh prezıdenti arasyndaǵy syrttaı pikir qaıshylyǵy sońǵy kúnderi halyqaralyq aqparat quraldarynyń nazaryn aýdaryp otyr.

ıAǵnı Tramp Rım Papasy Lev XIV-ti synǵa aldy. Al Rım Papasy demokratııanyń «kópshiliktiń tıranııasyna» aınalý qaýpin synady.