Papa Frantsıskten keıingi taq ıesi qashan anyqtalady

VATIKAN. KAZINFORM – Rım Papasyn saılaýǵa arnalǵan kardınaldar jınalysy – konklav 5 mamyrda ótýi múmkin. Bul týraly TASS agenttigi jazdy.

Qasıetti Taqtyń baspasóz qyzmetiniń habarlaýynsha, kardınaldar kongregatsııasynyń sársenbi kúngi otyrysynda pontıfık qaıtys bolǵannan keıingi toǵyz kúndik qaraly kezeń – 26 sáýirde ótetin jerleý rásiminen bastap, 4 mamyrda aıaqtalatyny belgili boldy.

Qazirgi tańda Apostol taǵynan bosaǵan kezeńge baılanysty uıymdastyrylǵan kongregatsııa jumysyna 103 kardınal qatysýda. Vatıkan aldaǵy kúnderi basqa da shirkeý ıerarhtarynyń kelýin kútip otyr. 

Kardınaldar kollegııasynyń jalpy sany – 252, onyń ishinde 135 kardınal ǵana konklavqa qatysyp, daýys bere alady. Bul – 80 jasqa tolmaǵan, daýys berý quqyǵy bar dinbasylar. Árqaısysy jańa Papa bolýǵa úmitker retinde qarastyrylady. Dástúrge saı, konklav Vatıkandaǵy Sıkstın kapellasynda ótedi. Kúnine tórt daýys berý kezeńi uıymdastyrylady. Jańa pontıfıkti saılaý úshin kardınaldardyń úshten ekisi oǵan daýys berýi qajet.

Rım Papasy Frantsısk 21 sáýir kúni 89 jasynda kóz jumdy.

Ol 2013 jyldan bastap Rım-katolık shirkeýin basqarǵan. Qoshtasý rásimi Áýlıe Petr soborynda ótip jatyr. Frantsısk óziniń ósıeti boıynsha Santa-Marııa-Madjore bazılıkasynda jerlenbek. Papanyń týǵan eli – Argentınada onyń qurmetine bir aptalyq qaraly kezeń jarııalandy.

Buǵan deıin Rım Papasyn jerleý rásimine álemdik kóshbasshylardan kimder qatysatynyn jazdyq.