Panfılovshylar saıabaǵyndaǵy úlken shuńqyr kópshiliktiń narazylyǵyn týǵyzdy
ALMATY. QazAqparat - Almatyda 28 Panfılovshy parkinde aýqymdy rekonstrýktsııa jumystary bastaldy, dep habarlaıdy QazAqparat tilshisi.
Jóndeý jumysyna kóńili tolmaǵan turǵyndar áleýmettik jelide óz oıyn jetkizip jatyr. Atap aıtqanda, park aýmaǵynda qazylǵan shuńqyr eldiń narazylyǵyn týǵyzdy .
Ákimdiktiń jaıly qalalyq orta basqarmasy buǵan qatysty túsinik berdi. Olardyń aıtýynsha, bul shuńqyr qosymsha rezervýar ustaý úshin qazylǵan.
«Parktiń sýǵarý júıesin úzdiksiz sýmen qamtamasyz etý úshin abattandyrý jobasynda qosymsha rezervýar ornatý qarastyrylǵan. Qazirgi tańda aýdany - 12/9/4,85 metr, kólemi - 300 tekshe metr bolatyn rezervýar ornatý bastaldy» dedi basqarmadan.
Bul joba «Jumyspen qamtý» baǵdarlamasy aıasynda júzege asyrylyp jatyr.
«Joba 2018 jyly jasaldy. «GSG Vysotnık» JShS-men kelisimshart jasaldy. Bıyl 28 Panfılovshy saıabaǵyn qaıta jańǵyrtý jobasy qaıta qaraldy. Jobalyq-smetalyq qujattama ózgertilip, qarajat qaıta esepteldi. Keıbir asa qajeti joq shyǵyndar qysqartyldy. Atap aıtqanda, sýburqaq qurylysy, balalar men sport alańdary salynbaıtyn boldy. Trotýar tastary 60 paıyzǵa ǵana tóseledi. Qazir park múlkiniń aqaý aktisi bar. Soǵan sáıkes ábden tozyǵy jetken dúnıeler ǵana aýystyrylady. Inspektsııa jumystary barlyq múliktiń jartysynan kóbi aýystyrýdy talap etetinin kórsetti», - dedi basqarmadan.
Atap aıtqanda, aryq júıesi 1980 jyldardan beri aýystyrylmaǵan. Al aryq naýalary asa qatty tozbaǵandyqtan, olardy aýystyrý keıinge qaldy. Bul qarajatty únemdeýge múmkindik berdi.
Joba boıynsha 111 jaryqtandyrý tuǵyryn aýystyrý kózdelgen.
«Ońtaılandyrý nátıjesinde tek qatty shirigen 21 tuǵyr aýystyrylatyn boldy. Bul munaralar 2020 jyldyń maýsymynda «Almaty qala jaryq» kompanııasy ókilderiniń qatysýymen alynyp tastaldy. Qalǵanynda tek shamdary aýysady» dedi basqarmadan.
