Panfılov aýdanynyń shendi polıtseıleri para aldy degen kúdikke ilindi

NUR-SULTAN. QazAqparat - Almaty oblysy Panfılov aýdanynyń shendi polıtseıleri para alý kúdigine ilindi. Bul týraly búgin QR Memlekettik qyzmet isteri jáne sybaılas jemqorlyqqa qarsy is-qımyl agenttigi qoǵammen baılanys departamentiniń dırektory Arman Berdalın aıtty, dep habarlaıdy QazAqparat tilshisi.

Onyń atap ótýinshe, Sybaılas jemqorlyqqa qarsy is-qımyl ulttyq bıýrosy QR Іshki ister mınıstrliginiń ózindik qaýipsizdik qyzmetimen birlesip, ishki ister júıesindegi adal emes qyzmetkerlerdi anyqtaý jumysyn jalǵastyryp jatyr.

«Sybaılas jemqorlyqqa qarsy is-qımyl ulttyq bıýrosynyń Almaty oblysy boıynsha departamenti oblystyq polıtsııa departamentiniń ózindik qaýipsizdik basqarmasymen birlesip, Panfılov aýdandyq polıtsııa bóliminiń ákimshilik polıtsııa bólimshesiniń bastyǵy (polıtsııa maıory), jergilikti polıtsııa qyzmetiniń bastyǵy (polıtsııa maıory), sondaı-aq osy aýdannyń patrýl polıtsııasynyń eki polıtseıiniń (polıtsııa serjanttary) paraqorlyq faktisin anyqtady», - dedi ol.

Departament basshysynyń sózine qaraǵanda, olar QR Qylmystyq kodeksiniń 339-baby boıynsha qylmystyq istiń buryn tárkilengen 2 491 dana ondatr terisin qaıtarý úshin jergilikti turǵynnan 700 myń teńge para aldy dep kúdikke iligip otyr.

«Tergeý jalǵasýda», - deıdi Arman Berdalın.