Panfılov aýdanynda turmystyq qatty qaldyqtardy óńdeıtin zaýyt iske qosyldy
ASTANA. QazAqparat - Turmystyq qatty qaldyqtardy óńdeıtin «MPK Áýlet» JShS-niń zaýyty aýdan aýmaǵynda jınalǵan qatty turmystyq qaldyqtardy óńdep, odan otyn túrlerin shyǵara bastady, dep habarlady Almaty oblysy ákimdiginiń baspasóz qyzmeti.
Turmystyq qatty qaldyqtardy óńdeıtin zaýyttar salý - oblys basshysynyń aýdan, qala ákimderiniń aldyna qoıǵan mańyzdy mindetteriniń biri. Sondyqtan Almaty oblysynyń ákimi Amandyq Batalovtyń Panfılov aýdanyna barǵan saparynda «MPK Áýlet» JShS turmystyq qatty qaldyqtardy óńdeıtin zaýyty nazardan tys qalǵan joq.
Jarkent qalasynyń soltústik-shyǵysynda ornalasqan zaýyttyń jer aýmaǵy 12 ga. Zaýyt dırektory Kenjebek Ermuhanbetovtiń aıtýynsha, zaýytty iske qosý úshin 70 mln. teńge ınvestıtsııa quıylǵan.
«Kásiporynnyń qýaty aıyna 600 tonna qoqsyq óńdeýge qaýqarly. Táýligine shyǵarylatyn daıyn ónim - peshke suıyq otyn - 8,5 tonna, kómir qaldyǵy - 7,4 tonna, metallokord - 1 tonna bolmaq. Zaýytty iske qosý arqyly aýdanda jınalyp qalǵan turmystyq qaldyqtardy joıý, ári 30 adamdy jumyspen qamtý múmkindigi paıda boldy. Zaýyt ózine ketken shyǵyndy 6 aıdyń ishinde aqtap shyǵady. Qazirdiń ózinde jergilikti turǵyndar qordalanyp qalǵan turmystyq qatty qaldyqtaryn zaýytqa belsendi ákelip, ótkizip jatyr. Ótkizilgen qaldyqtyń ár kelisine 10 teńgeden tólenedi, - dedi K.Ermuhanbetov.
Batalov sózinde óńirde qaldyq óńdeý máselesi ózekti problemalardyń biri ekenin atap ótti.
«Meniń tarapymnan barlyq aýdan, qala ákimderine qatty turmystyq qaldyqtardy óńdeıtin zaýyt salý týraly tapsyrma berilgen bolatyn. Qoıylǵan tapsyrmany alǵashqylardyń biri bolyp Panfılov aýdany oryndady. «MPK Áýlet» sııaqty kásiporyndardy qoldaýymyz qajet. Bul tek ekologııalyq máselelerdi sheship qana qoımaı, óńirdiń ekonomıkasyna da oń yqpalyn tıgizedi, - deı kele, oblystyq kásipkerlik jáne ındýstrıaldy-ınnovatsııalyq damý basqarmasynyń basshysy M. Muratqa «Bıznestiń jol kartasy-2020» baǵdarlamasy boıynsha zaýytqa nesıe bólý múmkindikterin qarastyrýdy tapsyrdy.
