Pándik Olımpıadalarda jeńiske jetý úshin oqýshylar arasynda básekelestikti damytý qajet - M. Ómirzaq
ALMATY. QazAqparat - Pándik Olımpıadalarda jeńiske jetý úshin oqýshylar arasynda básekelestikti damytý qajet. «QazAqparat» tilshisine Almatyda ınformatıka páninen ótken XXVII Halyqaralyq Olımpıadanyń kúmis júldegeri, almatylyq Meırambek Ómirzaq osyndaı pikirin bildirdi.
«Árıne, Qazaqstanda daryndy oqýshylar arasynda básekelestik qazir jaqsy deńgeıde. Biraq ony barynsha damyta túsken abzal. Sonda pándik Olımpıadalarda sheteldikterdi basyp ozyp, altyn júldelerge qol jetkizýge bolady. Al men birinshi týrda azdap qobaljydym. Sodan bolar, nátıje onsha kóńilimnen shyqpady. Esesine ekinshi týr jaqsy ótti. Tapsyrmalar kúrdeli, biraq sheshýge bolady. Nátıjesinde kúmis medalǵa ıe boldym», - dedi M. Ómirzaq.
Sonymen qatar, Almatydaǵy Qazaq-túrik lıtseıiniń túlegi ınformatıkadan Halyqaralyq olımpıadanyń Almatyda ótkenine rızashylyǵyn bildirdi.
«Olımpıada óte joǵary dárejede ótti. Uıymdastyrý jaǵy kóńilimnen shyqty. Bul úshin QR Bilim jáne ǵylym mınıstrligi men «Daryn» respýblıkalyq ortalyǵy basshylyǵyna aıtar alǵysym sheksiz. Al ózim endi bolashaǵymdy osy ınformatıkamen baılanystyramyn. Endigi alar bilimimdi Ońtústik Koreıada jalǵastyrǵym keledi. Óıtkeni, dostarymnyń kóbisi sol jaqqa attanbaq. Men de olardan alystaǵym kelmeıdi. Otanyma myqty maman bolyp oralamyn», - dedi M. Ómirzaq.
