Pánderdi biriktirý reformasy nege toqtady – Juldyz Súleımenovanyń jaýaby

ASTANA. KAZINFORM – Oqý-aǵartý mınıstri Juldyz Súleımenova Úkimet otyrysynan keıin ótken baspasóz máslıhatynda pánderdi biriktirý orta joldan toqtatylǵanyn rastady.

- Buǵan deıin pánderdi biriktirý jospary týraly aıtylǵan bolatyn. Qatelespesem, algebrany geometrııamen, hımııany fızıkamen biriktirý josparlanǵan bolatyn. Bul bastamanyń aıaǵy ne boldy, - dep surady jýrnalıst.

Mınıstr atalǵan ózgeris orta joldan toqtatylǵanyn aıtty.

- Iá, 2025 jyly alqa májilisinde úsh pándi biriktirý kerek degen sheshim qabyldanǵan. Fızıka, hımııa, bıologııa pánderin jaratylystaný ǵylymdaryna, algebra men geometrııa matematıkaǵa, dúnıejúzilik tarıh pen quqyq negizderin áleýmettik ǵylymdarǵa biriktirý kerek edi. Bul reforma toqtatyldy, - dedi Juldyz Súleımenova.

Vedomstvo basshysy irgeli ǵylymdardy bólek-bólek oqytý kerek dep esepteıtinin aıtty.

- Bul muǵalimderdiń júktemesi týraly másele. Sondyqtan biz muǵalimder qaýymdastyǵymen máseleni talqyladyq. Taldaı kelip, tsıfrlanǵan álemde balalarymyz negizgi pánderdi jaqsy bilýi úshin bul reformany toqtattyq, - dedi mınıstr.

Eske salsaq, elimizde alǵashqy áskerı daıyndyq pánin oqytý tártibi ózgertilgen.