Pandemııanyń óner salasyna da tıgizgen zardaby az bolǵan joq – Máýlen Áshimbaev
«Teatr – adamdy mádenıettiń bıigine jeteleıtin óner ordasy. Sondyqtan ol jerge kórermen bolyp barýdyń ózi úlken jaýapkershilik. Búgin «Astana Opera» memlekettik opera jáne balet teatrynda «Qyz Jibek» operasyn tamashalap otyryp, osy bir dúnıege kezekti ret kóz jetkizdim.
Qoıylym búgin resmı túrde ashylǵan «TEATR ALL-2021» halyqaralyq teatr festıvali aıasynda sahnalandy. Festıvaldiń «Qyz Jibek» operasymen ashylýy tegin emes. Óıtkeni, byltyr ǵana osy jyrdyń jelisimen túsirilgen áıgili fılmge 50 jyl toldy. Onyń ústine, qazaq óneriniń damýyna ólsheýsiz úles qosqan kompozıtor Evgenıı Brýsılovskııdiń atalǵan shyǵarmasy ulttyq operamyzdaǵy shoqtyǵy bıik týyndylardyń biri. Sol sebepti, bul joly da, ádettegideı, asqaq ónerdiń ozyq úlgisine kýá boldyq. Osy rette «Astana Opera» ártisteriniń kásibı sheberlikteri men biliktilikterin erekshe atap ótken jón»,-dedi Senat tóraǵasy.
Onyń aıtýynsha, táýelsizdigimizdiń 30 jyldyǵyna oraı Nur-Sultan qalasynyń ákimdigi uıymdastyrǵan óner festıvali bir aptaǵa jalǵasady. Oǵan elimizdiń jetekshi teatrlary qatysyp jatyr.
«Elordamyzdaǵy drama, mıýzıkl, opera, balet, jastar teatrlary sııaqty irgeli óner ujymdary da kórermenderge óz qoıylymdaryn tartý etedi. Sondaı-aq, festıval aıasynda túrli kórmeler men sheberlik sabaqtary ótkizilmek. ıAǵnı, astanalyqtarǵa apta boıy ónerdiń saf túrimen sýsyndap, rýhanı lázzat alýǵa mol múmkindik bar.
Pandemııanyń óner salasyna da tıgizgen zardaby az bolǵan joq. Sondyqtan osyndaı ıgilikti isterdiń arqasynda sol olqylyqtardyń orny tolyp, elimizde teatrǵa barýshylardyń qatary kóbeıedi dep senemiz. Bul ulttyq sananyń ósýine de yqpal etetin mańyzdy qadam ekeni sózsiz. Soǵan baılanysty festıval ótkizip, qala turǵyndary men qonaqtaryna, jalpy ónersúıer qaýymǵa keremet múmkindik syılaǵan barsha uıymdastyrýshylarǵa alǵysymyzdy bildiremiz. Qazaq teatr óneri jasaı bersin!»,-dedi Máýlen Áshimbaev.
