Pandemııamen kúreste kóz jumǵan áriptesterimniń esimi Qazaqstan tarıhynda qalýy kerek – Juldyz Danbaeva
«Sońǵy eki jyl biz úshin shynymen aýyr boldy», - dep bastady áńgimesin 30 jyldyq ótili bar dáriger.
Pandemııadan bir jyl buryn ol basqaratyn mekeme 3 statsıonardyń basyn qosyp, kópbeıindi qalalyq aýrýhana bolyp qurylǵan edi.
Ujym jańa formattaǵy jumysqa endi úırenip, qalypqa túsen kezde pandemııa bastalyp, úlken synqa túsedi.
«11 naýryzda alǵashqy 100 tósektik provızorlyq statsıonar bizde ashyldy. Al 18 naýryz kúni Ramada Plaza degen demalys keshenin de bizge qosty. 20 naýryzda Ramada Plaza-da 800 oryndyq statsıonar ashtyq. Odan keıin de qosymsha oryndar ashylyp jatty. Mamyr aıynda statsıonarlar jabyla bastady. Bir aı ótkende pnevmanııa bastaldy da, taǵy 500 oryndyq statsıonardyń jumysyn uıymdastyrdyq. Ramada Plaza-da da, ınfektsııalyq blokta da emdeý júrgizildi. Osy eki jyl biz úshin óte aýyr boldy. Ókinishke qaraı, qatarymyzdaǵy dárigerler maıdanda júrip qaıtty. Olardyń attary Qazaqstannyń tarıhynda máńgilik qalady dep oılaımyn», -deıdi dáriger.
Aıtýynsha, eki jyldy onyń ujymy koronavırýs juqtyrǵan 9757 adamdy emdegen.
«Infektsııalyq blokta 2448 adamǵa kómek kórsettik. Sońǵy bir aıdyń ishinde ǵana 143 júkti áıeldi emdep shyǵardyq. 45 náreste dúnıege keldi. Qazir byltyrǵa qaraǵanda jumys jeńildeý. Naýqas juqtyrý derekteri azaıǵandyqtan 600 medıtsına qyzmetkeri kúni-túni jumys istep jatyr. Úkimet tarapynan bizge óte jaqsy kómek pen qoldaý berilip otyr. Byltyr 11 adam joǵary nagradalarmen marapattaldy. Ózderińiz bilesizder, memleket indetpen kúresken dárigerler ústemeaqy tólep jatyr. Bul bizge óte jaqsy kómek boldy. Oǵan deıin maman tapshylyǵyn kádimgideı sezinigen bolatynbyz», - dep eske alady Juldyz Danbaeva.
Aty tanys bolsa da, zaty beıtanys indetten alǵashynda medıtsına mamandarynyń ózi qatty seskengen sııaqty.
Sol kezde bas dárigerdiń ózine bilek sybanyp, maıdanǵa kirisýine týra kelgen eken.
«Byltyr alǵashynda jumys isteıtin maman tapshy boldy. Kóbi qorqyp, bas tartyp jatty. Sonda men ózim bastap, orynbasarym men meńgerýshi bar, birinshi bolyp úlgi kórsetýge týra keldi. Jedel járdem kólikteri naýqastardy ákep jatsa da, qabyldap alatyn maman tappaı qaldyq basynda. Sol kezde orynbasarym ekeýmiz ǵana naýqastardy qabyldaı bastadyq. Ózimde de qorqynysh boldy. Biraq qoryqqanmen, adamdardyń ómirin bireý kelip qutqaryp bermeıdi ǵoı. Birinshi bolyp, halatymdy sheship, arnaıy kostıýmdi kıip, naýqastarǵa bettedim. Sodan keıin baryp, artymnan qyzmetkerler ere bastady», - deıdi maman.
Dáriger osyndaı qysyltań shaqta erkitlerdiń kómegi erekshe demeý bolǵanyn utypapty.
«Osyndaı kezeńde Ramada Plaza-ǵa 200 volonter shaqyrtyp, sanıtardyń jumysyn úırettik. Stýdenttermen birge eldegi jaǵdaıǵa beıjaı qaramaıtyn zańgerler, muǵalimder erikti túrde kelip, atsalysqany esimde. Qazirge deıin solar jumys istep júr. Qazir maman tapshylyǵy joq. Pandemııa órship turǵan kezde demalmaı jumys isteıtinbiz. Eki aıdaı úıdiń betin kórmeı, 5 táýlikten demalyssyz jumys istedik. Qazir ondaı júktemeni keste boıynsha retteýge múmkindik bar», - deıdi bas dáriger.
Jaǵdaı rettelip, indetpen kúresýdiń júıesi tolyq qalyptasqanymen, elordada koronavırýstyń taralýy áli tıylya qoıǵan joq. Muny maman vaktsınalaýǵa eldiń áli de bolsa beıja qaraýymen baılanystyrady.
«Degenmen, naýqastar sany azaıyp jatqan joq. Ókinishke qaraı, adamdar vaktsınanyń tıimdiligin tolyq túsinip jatqan joq. Qazir aýrýhanaǵa túsip jatqandardyń bári – vaktsına almaǵandar. Qazir bizge túsetinderdiń jaǵdaıy aýyr bolyp keledi. Byltyrǵyǵa qaraǵanda jansaqtaý bólimine túsetinderdiń sany kóp. Keıde kezekshilikke túsken kúni jaǵdaı qalypty bolyp turady da, táýlik óte bere naýqastar kóbeıip ketedi. Naýqas juqtyrý qarqyny kúrt artatyn kezder bolyp turady. Bıylǵy jyldyń qıyndyǵy osy bolyp tur», - deıdi Julzdy Danbaeva.
Qazir №3 kópbeıindi aýrýhanada 1248 adam jumys isteıdi. Sonyń 11-i pandemııamen kúreste jankeshtilik kórsetkeni úshin Úkimettik nagrada alǵan. Al bas dáriger Juldyz Danbaevaǵa Konstıtýtsııa kúnine oraı «Parasat» ordeni tabys etilgen bolatyn.
«Dáriger bolyp jumys istep jatqanyman 30 jyl boldy. Anam jaǵynan alsaq, dárigerler áýletinen shyqqanmyn dep aıtýǵa bolady. Eki ápkem de dáriger. Sondyqtan bala kezimde dáriger bolatynymdy anyq bildim», - dep aıaqtady ol áńgimesin.