Pandemııamen kúreste aldaǵy birneshe apta basty mańyzǵa ıe - DDU
NUR-SULTAN. QazAqparat - Dúnıejúzilik densaýlyq saqtaý uıymy Eýropa elderin koronavırýspen kúreste qyraǵylyq tanytýǵa shaqyrdy. Sebebi pandemııamen kúreste aldaǵy birneshe apta asa mańyzdy bolmaq, dep habarlaıdy QazAqparat Memlekettik komıssııanyń shuǵyl shtabyna silteme jasap.
«Dúnıejúzilik densaýlyq saqtaý uıymy Eýropa elderin koronavırýs ınfektsııasymen kúreste qyraǵylyq tanytýǵa shaqyrady. Pandemııamen kúreste aldaǵy birneshe apta basty mańyzǵa ıe bolady», - dep málimdedi DDU Eýropalyq bıýrosynyń dırektory Hans Klıýgge.
Germanııa, Italııa, Ispanııa, Frantsııa jáne Shveıtsarııada koronavırýstyń anyqtalý jaǵdaılary tómendegenine qaramastan, indet Belarýste, Ulybrıtanııa, Reseı, Túrkııa jáne Ýkraınada tez taralyp jatyr.
DDU óńirlik bıýrosynyń basshysy «jeńis ońaı bolmaıtynyn» eskertti.
Hans Klıýgge múltiksiz saqtaý kerek sharttardy atady:
- Densaýlyq saqtaý júıesi qaýip tobyndaǵy adamdardy anyqtap, oqshaýlap, test jasaýy kerek;
- Qarttar úılerinde, psıhıkalyq aýrýlarǵa arnalǵan mekemelerde jáne basqa da adamdar kóp jınalatyn oryndarda vırýstyń taralý qaýpin barynsha azaıtý qajet;
- Jumys oryndarynda vırýstyń aldyn alý úshin jaǵdaı jasaý, aınaladaǵy adamdardan ózin alys ustaý, qol jýý jáne basqa da gıgıena sharalaryn saqtaý qajet;
- Barlyq elderge, ásirese, shekteýlerdi alyp tastap, koronavırýspen kúrestiń jańa kezeńine ótip jatqan memleketterdiń tájirıbesine qaraý usynylady.
