Pandemııaǵa qaramastan Qazaqstan men Saýd Arabııasy arasynda saýda kólemi artty – Baqyt Sultanov
Qazaqstan-Saýd Arabııasy saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi Úkimetaralyq komıssııasynyń 5-shi otyrysyna qatysý úshin elordaǵa ınvestıtsııalar mınıstri Halıd A. ál-Falıh bastaǵan Saýd Arabııasy Koroldiginiń delegatsııasy keldi. Forýmnyń ashylýynda QR Saýda jáne ıntegratsııa mınıstri Baqyt Sultanov eki el yntymaqtastyǵynyń jańa múmkindikteri týraly aıtyp berdi.
«Búgingi platforma – Qazaqstan men Saýd Arabııasy arasyndaǵy ekijaqty yntymaqtastyqty nyǵaıtýdyń mańyzdy quraldarynyń biri. Vedomstvoaralyq komıssııamyzdyń tóraǵasy retinde men bul jumysty óte jaqsy baǵalaımyn. Saýd Arabııasy Koroldigi – Qazaqstannyń Taıaý Shyǵystaǵy mańyzdy seriktesi. Bizdiń memleket basshylary arasyndaǵy tyǵyz ózara qarym-qatynas qos tarapqa da yntymaqtastyq pen paıda tabý úshin jaqsy negiz bolady. Biz eki el arasynda tikeleı baılanys ornattyq», - dedi Saýda mınıstri forým qatysýshylaryna.
Onyń aıtýynsha, pandemııa saldaryna qaramastan bıylǵy 7 aıda eki eldiń ekijaqty saýdasy 36,5%-ǵa artqan.
«Daǵdarys jyldary jahandyq ekonomıkadaǵy, onyń ishinde bizdiń elderimizdiń ekonomıkasyndaǵy qurylymdyq ózgeristerdi de kúsheıtti. Іs júzinde Saýd Arabııasyn damytýdyń memlekettik baǵdarlamasy-2030 jáne Qazaqstan-2050 damý baǵdarlamasy bir maqsatqa – ekonomıkany ártaraptandyrýǵa, tabıǵı resýrstar eksportyna táýeldikti azaıtýǵa jáne eń damyǵan elder reıtıngine enýge baǵyttalǵan. Bizdiń elderimizdiń yntymaqtastyqty kúsheıtýge zor áleýeti bar. Qazir bir ǵana Qazaqstanda Saýd Arabııasy kapıtalynyń úlesi bar 11 kásiporyn jumys isteıdi. Olar negizinen bólshek saýdada, aqparattyq kommýnıkatsııa jáne memlekettik tranzaktsııalar salasynda jumys isteıdi», - dedi B. Sultanov.
Aıta keteıik, Qazaqstan-Saýd Arabııasy ınvestıtsııalyq bıznes-forýmyna eki eldiń isker toptary men bıznesiniń 170-ten astam ókili qatysýda. Shara barysynda saýdııalyq kompanııalar jeke sektordy damytý, serpindi qoǵam qurý jáne Koroldiktiń halyqaralyq saýdadaǵy básekege qabilettigin arttyrýdy kózdeıtin «Saudi Vision 2030» ulttyq baǵdarlamasyn iske asyrý tájirıbesimen bólisedi.
