Pandemııaǵa eki jyl: Álemde koronavırýs juqtyrǵandar sany 453 mln-nan asty
2020 jyly 11 naýryzda Jenevada ótken baspasóz májilisinde uıymnyń bas dırektory Tedros Adhanom Gebreıesýs KVI-di pandemııa dep atady.
«Bizdiń boljam boıynsha, aldaǵy ýaqytta aýrý juqtyrǵandar qaıtys bolatyndar jáne zardap shekken elder sany artady... Osyǵan baılanysty biz COVID-19-dy pandemııa retinde sıpattalýy múmkin degen baǵa berip otyrmyz», - dep jazdy ol DDU-nyń Twitter paraqshasynda.
Dúnıejúzilik densaýlyq saqtaý uıymynyń málimeti boıynsha, eki jyl ishinde álemde koronavırýs juqtyrǵandar sany 453 mıllıonnan asyp, 6,03 mıllıon adam qaıtys boldy. Sońǵy táýlikte aýrýdy juqtyrǵandar sany 1 816 925 adamǵa ósip, 7 163 adam qaıtys bolǵan.
Juqtyrǵandar sany boıynsha Amerıka Qurama Shtattary (78,6 mıllıonnan astam) kósh bastap tur. 2-orynda - Úndistan (42,9 mıllıon), 3-orynda - Brazılııa (29,1 mıllıon). Koronavırýstan eń kóp qaıtys bolǵandar sany jaǵynan da joǵaryda aty atalǵan úsh memleket aldyńǵy qatarda. AQSh-ta -954 myń, Brazılııa - 652 myń jáne Úndistanda 515 myń adam tirkelgen.
Eýropada «deltakron» shtamy tirkeldi
Dúnıejúzilik densaýlyq saqtaý uıymy Tótenshe jaǵdaılar bólimi tehnıkalyq tobynyń jetekshisi Marııa van Kerkhove baspasóz májilisinde Eýropada koronavırýstyń «deltakron» shtamy tirkelgenin atap ótti.
«Ol Frantsııada, Nıderlandyda jáne Danııada anyqtaldy. Biraq juqtyrý deńgeıi óte-óte tómen»,-dedi ol.
Sondaı-aq Van Kerkhove «deltakron» «delta» men «omıkron» shtamdarynyń birigýi saldarynan paıda bolǵanyn da eske salyp ótti.
Qańtar aıynyń basynda Kıpr ýnıversıtetiniń bıologııalyq ǵylymdar fakýltetiniń bir top ǵalymdary koronavırýstyń jańa shtamy – «delta» men «omıkron» gıbrıdiniń paıda bolǵany jóninde habarlaǵan edi.
Ispanııada KVI-men kúresý úshin jańa «jol kartasy» engizilmek
IspanııanyńDensaýlyq saqtaý mınıstrligi men eldiń avtonomııaly qaýymdastyqtary koronavırýs pandemııasymen kúresýdiń jańa strategııasyn ázirleýdi josparlap otyr.
Bul jumys pandemııanyń kelesi kezeńin anyqtaıtyn «jol kartasy» túrinde jasalyp, júrgiziletin bolady. Ǵımarat ishindegi mindetti maska rejımi qashan alynyp tastalatyny da osy jobada qarastyrylmaq.
Osy maqsatta ortalyq jáne aımaqtyq úkimetterdiń ókilderi Saragosadaǵy «Qoǵamdyq densaýlyqty qadaǵalaý jónindegi ulttyq densaýlyq saqtaý júıesiniń konferentsııasynda» kezdesedi. Birinshiden, tehnıkalyq mamandar densaýlyq daǵdarysyn eńserýdiń jańa krıterıılerin usynǵan, al 10 naýryzda el úkimeti ony bekitedi dep josparlanǵan.
Frantsııada aýrhanaǵa túskender sany azaıýda
Frantsııanyń Densaýlyq saqtaý mınıstrliginiń málimetinshe, elde koronavırýsqa qatysty aýrýhanalarǵa túskender sany azaıyp otyr. Frantsýz aýrýhanalaryna COVID-19-ben aýyratyn 21 509 naýqas jatqyzylǵan, ótken táýlikte 1 147 adam aýrýhanaǵa túsken. 1962 adam jansaqtaý bóliminde jatyr.
Sonymen qatar sońǵy 24 saǵatta COVID-19-dan 136 adam qaıtys boldy. Jalpy indet bastalǵaly beri Frantsııada 111 511 turǵynyn qaıtys boldy.
Aýstralııa KVI-men kúreske 2,1 mıllıard dollar bólmekshi
11 naýryzda Aýstralııa aýmaqtarynyń úkimet basshylary men shtattarynyń premer-mınıstrleri Ulttyq mınıstrler kabınetiniń otyrysynda kezdesedi dep josparlanyp otyr. Kezdesýdiń negizgi taqyryby - omıkron shtamynyń jańa nusqasynyń taralýynyń aldyn alý. Tumaýdyń keńinen taralýyna ákeletin koronavırýstyń jańa sýbshtamymen kúresý úshin bılik 2,1 mıllıard dollar bólmekshi.
Sonymen qosa Aýstralııanyń densaýlyq saqtaý mınıstri Greg Hant baspasóz máslıhatynda sóılegen sózinde eldegi medıtsına organdary qazir azamattarǵa bekitilgen vaktsınalardyń tórtinshi dozasymen COVID-19-ǵa qarsy qaıta vaktsınatsııalaýdy usyný máselesin belsendi túrde qarastyrylyp jatqanyn aıtuan edi. Onyń sózinshe, avstralııalyq ımmýndaý boıynsha tehnıkalyq keńes berý toby birneshe apta boıy vaktsınanyń tórtinshi dozasyn engizý týraly usynysty zertteý ústinde. Mınıstrlik bastapqy zertteýlerden keıin retteýshi organ 65 jáne odan joǵary jastaǵy adamdarǵa ekinshi kúsheıtkish dozany usynbaqshy.
Shvetsııada qaıtys bolǵandar sany artty
Shvetsııada COVID-19-dan tirkelgen ólim-jitim sany ótken táýlikte 56-ǵa ósti. Elde jalpy COVID-19-dan barlyǵy 17 749 adam qaıtys boldy. Al koronavırýs ınfektsııasyn juqtyrǵandar sany 2 465 099-ǵa jetken.
Sonymen qosa elde 12 jastan asqan 7 810 213 adam (86,9%) COVID-19 vaktsınasynyń birinshi dozasyn, 7 600 009 (84,6%) ekinshi dozasyn alǵan. 18 jastan asqan 5 037 058 shved revaktsınalaýdan ótti (61,0%). Eske salaıyq, 22 aqpannan bastap ekpe egilgender týraly aqparat beısenbi kúnderi ǵana jańartylady.
Ońtústik Koreıada 300 myńǵa jýyq azamat KVI jańa túrin juqtyrdy
Ońtústik Koreıanyń aýrýlardy baqylaý jáne aldyn alý ortalyǵynyń málimeti boıynsha, elde ótken táýlikte koronavırýstyń jańa túrin 282 987 adam juqtyrǵany tirkelgen.
Ortalyqtyń dereginshe, 282 880 jaǵdaı ınfektsııanyń el ishinde taralýyna baılanysty tirkelse, qalǵany respýblıkaǵa shetelden kelgen. Osylaısha, Ońtústik Koreıada SARS-CoV-2 ınfektsııasynyń tirkelgen jaǵdaıynyń jalpy sany 5 822 626-ǵa jetti. Sonymen qatar sońǵy táýlikte elde pandemııa bastalǵaly beri koronavırýs ınfektsııasynan qaıtys bolǵandar sany 229-dy qurap, rekordtyq kórsetkishke jetken. Al jalpy 9875 adam COVID-19-dyń qurbany boldy.
Rýmynııada vırýs juqtyrǵandar sany azaıýda
Rýmynııada ótken táýlikte SARS-CoV-2 ınfektsııasynyń 4176 jańa jaǵdaıy tirkeldi, bul aldyńǵy kúnmen salystyrǵanda 12%-ǵa az. Resmı aqparatqa sáıkes, juqtyrǵandar sanynyń tómendeýi eldiń soltústik jáne soltústik-batys aımaqtarynda tirkelgen. Sonymen birge Býharest, ıAssy, Býhaý jáne basqa da iri qalalarda koronavırýspen aýyratyndar kórsetkishi joǵary ekeni áli de baıqalyp otyr.
10 naýryzdaǵy jaǵdaı boıynsha, COVID-19 juqtyrǵan Rýmynııa azamattarynyń jalpy sany 2,78 mıllıondy qurady, onyń ishinde 64 156 naýqas qaıtys boldy.
Qazaqstanda vırýs juqtyrǵandar sany qaıtadan artyp keledi
Qazaqstanda 2022 jylǵy 11 naýryzdaǵy jaǵdaı boıynsha, óńirlerindegi epıdemıologııalyq ahýaldy baǵalaý matrıtsasy jarııalandy. Oǵan sáıkes, «qyzyl» jáne «sary» aımaqtarda ornalasqan óńir joq. «Jasyl» aımaqqa barlyq óńir engen: Nur-Sultan, Almaty, Shymkent qalalary, Almaty, Aqtóbe, Atyraý, Aqmola, Batys Qazaqstan, Shyǵys Qazaqstan, Jambyl, Qaraǵandy, Qostanaı, Qyzylorda, Mańǵystaý, Soltústik Qazaqstan, Pavlodar, Túrkistan oblystary.
Degenmen koronavırýs juqtyrǵandar sany qaıta artyp keledi. Ótken táýlikte elimizde koronavırýs ınfektsııasyn juqtyrýdyń 119 jaǵdaıy tirkeldi. Aıta keteıik, 9 naýryzda qaýipti indet 89 adamda tirklegen bolatyn.
Jalpy pandemııa bastalǵaly Qazaqstanda 1 304 220 adamnan koronavırýs anyqtaldy.
Qazaqstanda koronavırýstyń taralýyna jol bermeý jónindegi vedomstvoaralyq komıssııa málimetinshe, KVI-ge qarsy vaktsınanyń І komponentin 9 415 905 adam, ІІ komponentin 9 052 853 adam saldyrǵan.
Sondaı-aq elimizde jasóspirimderdi, júkti áıelderdi jáne bala emizetin analardy «Pfizer» vaktsınasymen egý jalǵasýda. 10 naýryzdaǵy derekke sáıkes, atalǵan vaktsınanyń І dozasyn 889 821 adam, ІІ dozasyn 677 501 adam saldyrdy.
Nazerke Súıindik
