Pandemııaǵa baılanysty Qazaqstanǵa shetelden dári-dármek jetkizý qıyndady

NUR-SULTAN. QazAqparat – Koronavırýs pandemııasyna baılanysty ártúrli syrqattardy emdeýge arnalǵan sheteldik preparattardyń keıbirin Qazaqstanǵa jetkizý qıyndap otyr, dep habarlaıdy QazAqparat tilshisi.

«Álbette, qazir keıde shaǵymdar túsedi. Álemdik pandemııaǵa baılanysty buǵan deıin jolǵa qoıylǵan logıstıkalyq protsestiń bári joıyldy, kóptegen elde shekara jabyldy. Tipti, óz qajettiligine baılanysty keıbir memleket osyǵan deıin shetelge shyǵaryp kelgen preparattardy endigári basqa elderge satpaıtynyn jarııa etti. Zaýyttardyń keıbiri toqtap ta qaldy. Máselen, Úndistandaǵy jaǵdaı boıynsha fors-major jaǵdaı týyndady. Sebebi ol eldegi Maharashtra shtatynda zaýyttardyń bári tolyǵymen jabyldy. Úndistanmen zoledron qyshqyly boıynsha kelisimshartymyz bar edi. Eldiń ózi karantınge jabylyp qalǵandyqtan, ony alyp shyǵý qıynǵa aınaldy», - dedi «SQ-Farmatsııa» JShS-niń basqarma tóraǵasy Berik Shárip Densaýlyq saqtaý mınıstrliginiń Facebook-paraqshasynda ótken suhbatta.

Onyń aıtýynsha, kúrdeli másele týyndaǵanymen eki eldiń arasyndaǵy kelissózderdiń arqasynda mamyr aıynyń sońyna deıin zoledron qyshqylyn Qazaqstanǵa jetkizý jospary bar.

Sondaı-aq ol taǵy 20 preparatty alyp kelýde problema týyndap otyrǵanyn aıtty.

«Jetkizý jaǵynan qıyndyq týǵyzyp turǵan 20 preparat bar. Onyń bárin de álemdik pandemııaǵa baılanysty Qazaqstanǵa alyp kelý qıynǵa aınalyp otyr», - dedi ol.

Máselen, bir memleket Qazaqstanǵa osyǵan deıin kelisilgen preparattardy endi jetkizbeıtinin jarııa etse, onda basqa kásiporyndarmen kelissóz bastalady.

«Al eger kelisimshart jasasqan kásiporyn belgili bir ýaqyt surasa, onda oǵan preparatty kesh te bolsyn jetkizý quqyǵy kompanııaǵa beriledi. Qazir álemde adamdardyń qozǵalysy shektelgenimen, tamaq pen dári-dármek tasymalyna ruqsat bar. Degenmen keıbir preparat boıynsha logıstıka sıpatyndaǵy qıyndyqtar týyndaǵanyn aıta ketý kerek», - dedi Berik Shárip.