Pandemııadan zardap shekken tórt myńnan astam kásipkerge 6 paıyzben nesıe beriledi
ALMATY. QAzAqparat - 10 jeltoqsandaǵy jaǵdaı boıynsha ekonomıkanyń eń kóp zardap shekken sektoryndaǵy 4180 shaǵyn jáne orta bıznes sýbektilerine jalpy somasy 754 mlrd teńge nesıeniń 6 paıyz stavkasyn sýbsıdııalaýǵa ótinim maquldandy, dep habarlaıdy QazAqparat tilshisi.
Baǵdarlamanyń operatory - «Damý» kásipkerlikti damytý qory.
Sýbsıdııany 2 738 shaǵyn jáne orta bıznes aldy. Bul - bekitilgen qaryz alýshylardyń jalpy sanynyń 65,5 paıyzy. 7 860 bank qaryz sharttary boıynsha tólengen sýbsıdııanyń jalpy somasy - 6,9 mlrd teńge.
Ekonomıkanyń zardap shekken sektorlaryndaǵy (ekonomıkanyń 29 salasynda) shaǵyn jáne orta bızneske berilgen barlyq qoldanystaǵy nesıeler boıynsha jyldyq 6%-ke deıingi paıyzdyq mólsherlemeni sýbsıdııalaý tótenshe jaǵdaı jarııalanǵannan bastap, ıaǵnı 2020 jyldyń 16 naýryzynan bastap 12 aı merzimge esepteledi.
«Qaryz alýshynyń bankpen baılanysqan kúnine qaramastan, onyń barlyq tólemderi 2020 jyldyń 16 naýryzynan bastap 2021 jyldyń 15 naýryzyn qosa alǵanda sýbsıdııalanady. Sýbsıdııa bankterge aýdarylady jáne ony qaryz alýshy óz nesıeleri boıynsha paıyzdardy tóleýge paıdalana alady. Eger ol nesıe merzimi aıaqtalǵan kezde paıdalanylmasa, onda ol qaryz alýshyǵa tólenedi «, - dedi Accenture Reseı men Qazaqstandaǵy strategııa jáne taldaý departamenti dırektorynyń orynbasary Dmıtrıı Zolotýhın.
Memlekettik sýbsıdııalaýǵa ótinimderdi qabyldaý 2020 jyldyń 30 qazanynan bastap 1 jeltoqsanyna deıin uzartylǵan bolatyn.
Bul shaǵyn jáne orta bıznestiń baǵdarlamaǵa kóbirek qatysýyna jáne bankterdiń qajetti aqparatty ýaqytynda «Damýǵa» jiberýine múmkindik berdi.
Sonyń arqasynda 600-ge jýyq ótinish qabyldandy.
«Bul sýbsıdııalaý mehanızmi Memleket basshysynyń 2020 jylǵy 1 qyrkúıektegi tapsyrmasyna sáıkes ázirlengen jáne úkimettiń daǵdarysqa qarsy pandemııa kezindegi shekteý sharalarynyń saldaryn barynsha azaıtý jónindegi sharalarynyń bóligi. Mehanızmdi jasaýǵa Ulttyq ekonomıka mınıstrligi, QR Qarjy naryǵyn retteý jáne damytý agenttigi, «Damý» qory, «Atameken», Qazaqstan qarjygerler qaýymdastyǵy qatysty «, - dep qorytyndylady Dmıtrıı Zolotýhın.
