Pandemııadan shyǵynǵa batqan pavlodarlyq kásipkerlerge 3 baǵytta qoldaý kórsetiledi
NUR-SULTAN. QazAqparat – Pavlodar oblysynyń ákimi Ábilqaıyr Sqaqov óńirdegi shaǵyn jáne orta bıznes salasyndaǵy kásipkerlerge úsh baǵytta kómek kórsetiletinin málim etti, dep habarlaıdy QazAqparat tilshisi.
«Agroónerkásip kesheni, óndiris sııaqty salalarda jaǵdaı turaqty bolǵanymen, karantın saldarynan óńirdiń shaǵyn jáne orta bıznesi zardap shekti. Sol sebepti kásipkerlerdi qoldaý 3 baǵytta júrgizilip jatyr. Olar: jergilikti kásiporyndardyń tapsyrys júktemesin arttyrý, memlekettik baǵdarlama boıynsha nesıe berý jáne jas kásipkerlerdi qoldaý», - dedi Ábilqaıyr Sqaqov OKQ-da ótken baspasóz máslıhatynda.
Kásiporyndardyń óndiristik qýatyn arttyrý týraly sóz qozǵaı kele óńir ákimi pandemııanyń oń nátıjesi baryn da atap ótti.
Aıtýynsha, karantın shekteýlerine baılanysty ımport azaıyp, ishki rezervtiń áleýetin damytýǵa jol ashylǵan.
«Biz qurylys ındýstrııasynyń, jeńil ónerkásiptiń, metall jáne aǵashtan jasalǵan buıymdardy óndirýshilerdiń, sondaı-aq aýyl sharýashylyǵy taýaryn óndirýshilerdiń múmkindikterin barynsha paıdalandyq. Osy jumystyń nátıjesinde 10 aıda olardyń júktemesi 75%-ǵa jetti. Sonymen qatar, iri kásiporyndardyń satyp alýlarynda jergilikti qamtý úlesin arttyrý boıynsha jumys únemi júrgizilýde. Odan bólek jyl basynan beri shaǵyn jáne orta bıznesti barlyq kózderden nesıeleý kólemi, onyń ishinde jergilikti kásipkerlikti qoldaý baǵdarlamasy 75 mıllıard teńgeden asty. Qarastyrylyp otyrǵan jergilikti baǵdarlama – «Halyq bankimen» birlesip júzege asyrylatyn jas kásipkerlerdi nesıelendirý bastamasy. Olar 7 jylǵa kepilsiz 5%-ben 15 mıllıon teńgege deıin nesıe ala alady», - dedi Ábilqaıyr Sqaqov.
Óńir basshysy ShOB jumysyn jandandyrýdyń úshinshi amaly - Zhas-Halyk. Ertis bastamasy ekenin atap ótti.
Bul baǵdarlama isin jańadan bastap jatqan kásipkerlerdi qoldaýǵa baǵyttalǵan. Osy baǵyt boıynsha aımaqta shaǵyn ındýstrııalyq aýmaqtar ashylyp jatyr.
Ol jerde isin jańadan bastap jatqan kásipkerlerge nysandardan tegin oryn beriledi. Sonymen qatar ondaǵy kásipkerlerge jan-jaqty servıstik qoldaý kórsetiledi.
«Bul sharalar kásipkerlikti qoldaýǵa jáne onyń ósimine kómektesedi», - dedi ol.
