Pandemııadan kem degende 800 myń qazaqstandyq kásipker zardap shekti - Máýlen Áshimbaev
«Biz búgin asa mańyzdy salany qarap, talqylaý úshin jınalyp otyrmyz. Shaǵyn jáne orta kásipkerlikti damytý – el ekonomıkasynyń ósimin jáne onyń turaqtylyǵyn qamtamasyz etýdiń negizgi sharttarynyń biri. Qazirgi ýaqytta bul máseleniń mańyzy burynǵydan da arta tústi.
Pandemııa birqatar salaǵa, onyń ishinde shaǵyn jáne orta bızneske de óz zardabyn tıgizdi. Kólik, saýda, qyzmet kórsetý, qoǵamdyq tamaqtaný, qonaq úı jáne jyljymaıtyn múlik bıznesi aıtarlyqtaı shyǵynǵa ushyrady», - dedi M. Áshimbaev Qazaqstanda shaǵyn jáne orta kásipkerlikti damytý salasyndaǵy memlekettik saıasatty jáne quqyqtyq retteýdi jetildirý taqyrybyndaǵy Parlamenttik tyńdaýda.
Osy oraıda Senat Tóraǵasy pandemııadan kem degende 800 myń qazaqstandyq kásipker zardap shekkenin jetkizdi.
«Qazirgi tańda shaǵyn jáne orta kásiporyndar shamamen 3 mıllıon 300 myń qazaqstandyqty jumyspen qamtyp otyr.
Bul ekonomıkalyq belsendi halyqtyń 39 paıyzyn quraıdy. Sondyqtan osy salanyń áleýmettik mańyzy óte zor. Shaǵyn jáne orta bıznes Memleket basshysynyń basty nazarynda. Prezıdentimiz bıylǵy Joldaýynda shaǵyn jáne orta bızneske qosymsha kómek retinde keshendi qoldaý sharalaryn usyndy», - dedi ol.
Pandemııaǵa baılanysty jeńildikpen beriletin nesıe kólemi aıtarlyqtaı ulǵaıdy. Nesıe tólemin 6 paıyzǵa deıin tómendetý úshin memlekettik sýbsıdııa berilip jatyr.
«Memlekettik organdar men kvazımemlekettik sektorǵa tıesili jyljymaıtyn múlik nysandaryn jalǵa alǵany úshin tólenetin jaldaý aqysy jyl sońyna deıin toqtatyldy. Shaǵyn jáne orta bıznes ókilderiniń eńbekaqy qoryna túsetin aýyrtpalyq jeńildetildi. Salyq kodesine birqatar mańyzdy túzetý eńgizilýde. Shaǵyn jáne orta bıznesti eki jylǵa qosylǵan qun salyǵynan jáne áleýmettik salyqtan bosatý usynyldy. Prezıdent tapsyrmasy boıynsha tabystyń 3 paıyzy kóleminde bólshek salyq engiziletin boldy. Osy jáne basqa sharalar shaǵyn jáne orta kásipkerlikti damytýǵa óz úlesin qosatyny sózsiz», - dedi Senat Tóraǵasy.