Pandemııa jaǵdaıynda Qazaqstannyń elektr energetıka salasyna qandaı qoldaý kórsetildi

NUR-SULTAN. QazAqparat – 2020 jyl ár túrli salalar úshin, sonyń ishinde Qazaqstandaǵy elektr energetıkasy úshin qıyn boldy. Energetıka mınıstrligi pandemııa kezinde bul salaǵa qandaı qoldaý kórsetilgendigi týraly aıtty, dep habarlaıdy QazAqparat tilshisi.

COVID-19 pandemııasy saldarynan týyndaǵan daǵdarys jaǵdaıynda otandyq munaıdy qaıta óńdeýdi qoldaý úshin Úkimet kelesi sharalardy qabyldady: munaı ónimderin Qazaqstannan tys jerlerge avtomobıl kóligimen shyǵarýǵa tyıym salý joıylsa, Keden odaǵy elderinen tys jerlerge munaı ónimderin shyǵarýǵa tyıym salyndy. Osy jyldyń sońyna deıin eksportqa satylatyn benzın men dızel otynyna aktsızdeletin taýar óndirýshiler aktsızder tóleýden bosatyldy. Reseıden Qazaqstanǵa benzın men dızel otynyn temirjol arqyly jetkizýge de tyıym salyndy.

Vedomstvoda aıtyp ótkende, joǵaryda atalǵan sharalardy iske asyrý munaı ónimderin tutynýdyń dúnıejúzilik quldyraýy jaǵdaıynda Qazaqstandaǵy munaı óńdeý zaýyttarynyń jumysyn toqtatý qaýpin barynsha azaıtýǵa múmkindik berdi.

Energetıka mınıstrligi ishki naryqta munaı ónimderiniń irkilip qalmaýy jáne zaýyt jumysynyń toqtamaýy úshin 2020 jylǵa arnalǵan munaı óńdeý josparyn 17 mln tonnadan 15,5 mıllıon tonnaǵa ózgertti. Sonymen qatar, Qazaqstanda 2020 jyldyń sońyna deıin baqylanatyn obektilerdi profılaktıkalyq baqylaýǵa jáne jer qoınaýyn paıdalanýshylarǵa barýǵa moratorıı jarııalanǵan (ruqsattar men jospardan tys rásimderdi qospaǵanda).

2020 jyly Energetıka mınıstrliginiń jumysy daǵdarys jaǵdaıynda munaı salasyn qoldaýǵa baǵyttaldy. 2020 jyldyń 11 aıynyń qorytyndysy boıynsha munaı óndirisi 78,5 mln tonnany, munaı eksporty 63 mln tonnany, óńdeý kólemi 14,4 mln tonnany qurady.

Koronavırýstyń taralýyna jáne kóptegen elderde karantın engizilýine baılanysty suranys pen usynystyń teńgerimsizdigi, munaı baǵasynyń tómendeýi jáne munaıdyń álemdik qorynyń ósýi oryn aldy. Munaı qoımalarynyń shamadan tys qorlanýyn, ken oryndarynyń toqtap qalýyn jáne munaı baǵasynyń kúrt tómendeýin boldyrmaý úshin Qazaqstan OPEK + kelisimine qosyldy jáne munaı óndirýdi shektedi.

OPEK + kelisimine qatysýshy basqa munaı óndirýshi elderdiń osy shekteýleri men osyǵan uqsas sharalarynyń arqasynda álemdik munaı naryǵynda suranys pen usynystyń tepe-teńdigi men munaı baǵasynyń birtindep qalpyna kelýi baıqalady. Mysaly, eger sáýirde Brent markaly munaıdyń barreliniń baǵasy 19 dollar bolsa, 2020 jyldyń jeltoqsanyna qaraı 51 dollardy qurady.

Osy shekteýlerge baılanysty Qazaqstanda 2020 jylǵa arnalǵan munaı óndirý boljamy 90-nan 85 mıllıon tonnaǵa deıin qaıta qaraldy. OPEK + kelisiminiń arqasynda ken oryndarynyń tótenshe toqtap qalýyn boldyrmaýǵa, jumys oryndaryn saqtap qalýǵa, sondaı-aq munaı qoımalaryn tolyp ketýden saqtaýǵa múmkindik týdy.