Pandemııa: ShQO-da 500-den astam kásipker jumysyn jandandyra almaı otyr

ÓSKEMEN. QazAqparat – Shyǵys Qazaqstan oblysynda búginde 500-den astam kásipkerlik sýbektisi jumysyn jandandyra almaı otyr, dep habarlaıdy QazAqparat tilshisi.

Pandemııa men karantındik shekteýler barlyq salaǵa óz áserin tıgizdi. Osy kezeńde kompanııalardyń kóbisi eleýli shyǵynǵa ushyrady. ShQO Kásipkerler palatasynyń málimetinshe, tótenshe jaǵdaı kezinde aımaqta 14 412 kásipkerlik sýbektisi óz qyzmetin toqtatýǵa májbúr boldy. Karantındik sharalar oıyn-saýyq ındýstrııasynan paıda taýyp otyrǵan kásip ókilderin tabystan aıyrdy.

«Kúni búginge deıin Shyǵys Qazaqstanda 530-ǵa taman kásipkerlik sýbektisi óz jumysyn qaıta bastaı almaı keledi. Onyń ishinde ınternet-klýbtar, býkmekerlik keńseler, bılıard, karaoke, boýlıng ortalyqtary bar. Oıyn-saýyq salasynda eńbek etken 4,3 myńǵa jýyq adam jumyssyz qaldy», - delingen ShQO Aqparat ortalyǵynyń habarlamasynda.

Pandemııa bastalǵaly beri úlken qıyndyqqa tap bolǵan salalardyń biri – týrızm. ShQO Statıstıka departamentiniń málimetine súıensek, tek 2020 jyldyń birinshi jartyjyldyǵynda ótken jyldyń sáıkes kezeńimen salystyrǵanda týrıstik oryndarǵa kelýshiler sany 32% azaıǵan. Demalýshylardy ornalastyrý oryndaryndaǵy qyzmetterdiń kólemi osy jyldyń 6 aıynda ótken jylmen salystyrǵanda 38,4% tómendedi. Koronavırýs ınfektsııasynyń ekinshi tolqyny órship, qatań shekteýler engizilse týrıstik kompanııalar bankrottyqqa ushyraıdy.