Pandemııa órship turǵan kezde «Altyn Orda» bazarynyń nege jabylmaǵany túsindirildi

NUR-SULTAN. QazAqparat – Pandemııa órship ketken kezderde búkil bazarlar jabylyp jatty. Al byltyr Almaty oblysy men qalasynda epıdahýal ýshyǵyp turǵan kezderdiń ózinde «Altyn orda» bazaryna mundaı shekteý qoldanylmady. Nege bulaı boldy? Ortalyq kommýnıkatsııalar qyzmetinde ótken brıfıngide ákimdik ókilderine osyndaı suraq qoıyldy, dep habarlaıdy QazAqparat tilshisi.

«Altyn orda» bazary boıynsha mynany aıtaıyn. Bul bazar eldegi azyq-túlik baǵasyn qalyptastyrýda úlken ról oınaıdy. Óıtkeni tolaıym saýda jasaýshylardyń kóbi ónimdi osy jerden satyp alady. Eger biz onyń jumysyn shektesek nemese birneshe kúnge jaýyp tastasaq, Almaty oblysy men qalasynan basqa óńirlerde de azyq-túlik baǵasy ósip, dúrbeleń týǵyzady. Bul jerde máselege jan-jaqty qaraý kerek», - dedi Almaty oblysy ákiminiń orynbasary Batyrjan Baıjumanov.

Onyń sózine qaraǵanda, bazar respýblıkalyq mańyzǵa ıe nysan bolǵandyqtan, ondaǵy sanıtarlyq-epıdemıologııalyq saqtyq sharalary jan-jaqty qadaǵalaýǵa alynǵan.

«Bazardaǵy núktelerdiń bári sanıtarlyq-epıdemıologııalyq normalardy saqtaý boıynsha retteýge jatady. «Altyn orda» bazarynda vaktsınatsııalaý beketteri men monıtorıng toptary jumys istep tur. Bazar basshylyǵyna da jumysty osy turǵyda retteý týraly túsindirý júrgizilgen. Maska rejımin eshkim joıǵan joq. Bul talap atalmysh bazarǵa da qosylyp otyr», - dedi oblys ákiminiń orynbasary.