Pandemııa mektep oqýshylary psıhıkasy buzylýynyń kúrt ósýine soqtyrdy

NUR-SULTAN. QazAqparat – Koronavırýs pandemııasy mektep oqýshylarynyń psıhıkalyq jaı-kúıiniń buzylý jaǵdaıynyń aıtarlyqtaı artýyna alyp keldi, dep habarlaıdy QazAqparat ORF teleradıokompanııasyna silteme jasap.

Dýnaı Krems ýnıversıteti men Vena medıtsına ýnıversıteti birlesken zertteý júrgizdi, oǵan 3052 oqýshy qatysty. Nátıjesinde balalardyń 56%-ynda depressııa belgileri bar ekeni anyqtaldy. Oqýshylardyń jartysy mazasyzdyqty sezinedi, tórtten biri uıqynyń buzylýynan zardap shegýde. Árbir altynshy oqýshynyń (16%) kún saıyn sýıtsıdtik oılary bolady eken.

«Depressııa men mazasyzdyq belgileriniń, sondaı-aq uıqynyń buzylýynyń jıiligi bes-on ese ósti jáne bul úrdis kúsheıe tústi. Sondaı-aq qazirgi ýaqytta sýıtsıdtik oıǵa batatyn jastardyń kóp bolýy alańdaýshylyq týdyrady», -deıdi Dýnaı Krems ýnıversıtetiniń zertteý jetekshisi Krıstof Pıe.

Zertteýshiler pandemııa kezinde mektep oqýshylarynyń smartfonǵa ketetin ýaqyty edáýir artqandyǵyna nazar aýdardy. Oqýshylardyń shamamen jartysy telefonǵa kúnine bes nemese odan da kóp saǵat jumsaıdy. Bul 2018 jylmen salystyrǵanda eki ese kóp.

«Psıhıkalyq aýytqýlardyń jıiligi uıaly telefondy kúndelikti qoldanýdyń kóbeıýine baılanysty artady», - dep atap ótti Krıstof Pıe.